«Biologiialyq qaýipsizdik týraly» QR Zańynyń jobasy Prezident qaraýynda jatyr. Bul týraly QR Densaýlyq saqtaý ministri Ajar Ǵiniiat aitty, dep habarlaidy QazAqparat.
«Kovid pandemiiasy kezeńinde densaýlyq saqtaý júiesiniń barlyq teris tájiribesin eskere otyryp, biz epidemiologiialyq qaýip-qaterdi boljamdaý men aldyn alýdyń qazirgi zamanǵy júiesin qalyptastyrýǵa baǵyttalǵan is-sharalardy kúsheitemiz. Memleket masshysynyń tapsyrmasyn iske asyrý aiasynda «Biologiialyq qaýipsizdik týraly» QR Zańynyń jobasy ázirlendi. 2022 jylǵy 28 sáýirde atalǵan zań jobasyn QR Parlamentiniń Senaty qabyldady. Búgingi tańda zań jobasy Memleket basshysynyń qaraýynda», - dedi ministr Ortalyq kommýnikatsiialar qyzmetinde ótip jatqan baspasóz máslihatynda.
Onyń aitýynsha, zań jobasynyń negizgi maqsaty - bul biologiialyq qaýipterdi erte anyqtaý, aldyn alý jáne profilaktikasy. Jalpy, mynadai negizgi biologiialyq qaýipter bar:
Birinshi, asa qaýipti infektsiialardyń tabiǵi oshaqtary elimizdiń jarty aýmaǵynda taralǵan. Mysaly oba 10 oblystyń, týliaremiia 12 oblystyń, gemorragiialyq qyzbalar 4 oblystyń jáne Shymkent qalasynyń aýmaǵynda bar.
Ekinshi, qaýipti infektsiialar syrttan ákelinedi. Qazaqstannyń halyqaralyq týristik jáne iskerlik bailanystardy keńeitýi nátijesinde jyl saiyn tyrysqaqtyń ákeliný jaǵdailary tirkeledi. Mysaly 2019 jyly Úndistannan tyrysqaqtyń 4 jaǵdaiy, Tailandtan Denge qyzbasynyń 3 jaǵdaiy, tropikalyq elderden bezgektiń 4 jaǵdaiy ákelindi.
Úshinshi, patogendi bioagenttermen jumys isteý kezinde talaptardyń buzylýy.
Tórtinshi, tótenshe jaǵdailar men terrorizm aktileriniń saldarynan joǵary qaýipti kózderge áser etýi.
Besinshi, biologiialyq qaýipsizdik salasynda bilikti kadrlardyń jetispeýshiligi.
«Sondyqtan zań jobasy boiynsha biologiialyq qaterge qarsy is-qimyldyń tiimdi júiesin mynadai baǵyttardyń aiasynda qurý josparlanýda: strategiialyq josparlaý; memlekettik basqarýdyń úilestirilgen vedomstvoaralyq júiesin qurý jáne onyń profilaktikalyq fýnktsiiasyn kúsheitý; beiindi qyzmetter men halyqtyń yqtimal tótenshe jaǵdailarǵa daiyndyǵyn qamtamasyz etý; patogendi bioagentterdiń ainalymy týraly derekterdi esepke alý men monitorintiń biryńǵai júiesin qurý jáne mikroorganizmderdiń ulttyq jáne jumys kollektsiialarynyń qyzmetin retteý. «Deni saý ult» ulttyq jobasyn iske asyrý aiasynda 2026 jylǵa deiin jyl saiyn sanitariialyq-epidemiologiialyq saraptamanyń 3 zerthanasyn jaraqtandyrý boiynsha is-sharalar kózdelgen. 2021 jyly 3 zerthana jabdyqtalǵan. Osy jyly taǵy da 3 zerthana jabdyqtalady», - dedi ol.
