Foto: Bagdat Kulmagambetov paraqshasynan
Syrtqy ister ministrligi Túrkiianyń Alaniia aimaǵynda taǵy bir qazaqstandyqtyń kólik apatynan qaitys bolǵanyn rastady, dep habarlaidy Kazinform agenttigi.
Qaiǵyly oqiǵa týraly kóz jumǵan kelinshektiń aǵasy Facebook-te jazǵan bolatyn.
«Juma, 13 qazanda qaryndasymyz Áliia Qulmaǵambetovadan aiyrylyp qaldyq. Jasy 38-de ǵana edi. Búkil ómiri alda, jospary kóp bolatyn. Ony Alaniianyń Kestel aýdanyndaǵy (Túrkiia) D 400 tasjolynda avtomobil qaǵyp ketti. Politsiianyń sózine qaraǵanda, ol joldy belgilengen bólikten, baǵdarshamnyń jasyl túsi janǵan kezde kesip ótken.
Tergeý júrip jatyr. Kólik tizgininde jas qyz bolǵan. Ony oqiǵanyń anyq-qanyǵyn anyqtaǵansha, úiine jiberdi. Osynyń aldynda ǵana Áliiajan jol-kólik oqiǵasyna kýá bolǵan edi. Tipti, ol týraly chatqa da jazǵan. Sondyqtan biz politsiia aityp otyrǵan nusqanyń durystyǵyna senimdimiz – joldy erejege sai kesip ótken. Túrik taraby tergeýdi ádil júrgizedi dep úmittenemiz», – deidi marqumnyń aǵasy.
Syrtqy ister ministrliginiń resmi ókili Aibek Smadiiarov qaiǵyly qazanyń bolǵanyn rastap, oqiǵanyń mán-jaiyn Baǵdat Qulmaǵambetov tolyq jazǵanyn málim etti.
Jazbada Áliia Qulmaǵabetovanyń ómiri úzilgen tasjoldyń «ajal joly» ekeni aitylǵan.
«Bir ai buryn ǵana Atyraýdan barǵan otbasynyń Túrkiiada kólik apatynan qaza bolǵany týraly aqparat eseńgiretken edi. Jol-kólik oqiǵasy taǵy da osy Alaniiadaǵy D-400 tasjolynda boldy. Jergilikti turǵyndar ony ajal joly dep ataidy. Jol jaǵalaýdy kóktep ótedi. Teńizge jetý úshin joldy kesip ótý qajet. Qaiǵyly oqiǵa týraly túrkiialyq pablikter jazdy», – dep jazdy Baǵdat Qulmaǵambetov.
Aitylǵandai, atalǵan trassada kóbine TMD elderinen kelgender ajal qushady. Sebebi bul memleketterde jaiaý júrginshi jolaǵynda adamdarǵa únemi jol beriledi.
Túrkiiaǵa baratyn qazaqstandyqtardy ásirese Alaniia aimaǵynda jol erejesin saqtaý ereksheligin eskerip, saq bolýǵa shaqyrǵan jazba avtory qaiǵyly oqiǵa kezinde qoldaý kórsetip, kómek usynǵan Qazaqstannyń bas konsýldyǵyna, onyń qyzmetkerlerine alǵys bildirdi.
Eske salsaq, qyrkúiekte Túrkiianyń osy Alaniia aimaǵynda Qazaqstan azamatshasy men onyń eki jasar sábii kóz jumǵan bolatyn. Keiin atalǵan otbasynyń otaǵasy da aýrýhanada qaitys boldy.
