Pavlodar oblysynda aýyldyq okrýg ákimderiniń biri ákimdik ǵimaratynda múgedektigi bar azamattarǵa arnalǵan arnaiy sanitarlyq toraptyń bolmaýyna bailanysty ákimshilik jaýapkershilikke tartyldy, dep habarlaidy ult.kz.
Halyqstan málimetinshe, Mai aýdanynyń Kóktóbek aýyldyq okrýginde júrgizilgen prokýrorlyq tekserý barysynda áleýmettik infraqurylym nysanynyń múmkindigi shekteýli azamattar úshin tolyq beiimdelmegeni anyqtalǵan.
Sot otyrysynda ákim ákimdik ǵimaratynda arnaiy ájethana joq ekenin moiyndaǵan. Onyń aitýynsha, zań talaptary týraly tolyq habardar bolmaǵan jáne buǵan deiin tek qarapaiym sanitarlyq torap ornatýǵa qarjy suratqan.
Alaida sot memlekettik mekemelerdiń ǵimarattary olardyń salynǵan ýaqytyna qaramastan barlyq azamattarǵa, sonyń ishinde múgedektigi bar adamdarǵa qoljetimdi bolýy tiis ekenin atap ótti. Sondai-aq qarjy tapshylyǵy zań talaptaryn oryndamaýǵa negiz bola almaityny kórsetilgen.
Nátijesinde aýyl ákimine 216 250 teńge kóleminde aiyppul salyndy. Ol sot sheshimine shaǵym túsirgenimen, joǵary turǵan sot qaýlyny ózgerissiz qaldyrdy.
Ýákiletti organnyń málimetinshe, prokýratýra anyqtaǵan uqsas zańbuzýshylyqtar jiyrmadan astam nysanda tirkelgen. Olardyń basshylaryna qatysty da tiisti sharalar qabyldanǵan.
