Aǵdam aimaǵynda júrgen Ázerbaijan saperleri.
Ázerbaijan tutqynǵa túsken 15 armian sarbazyn mina alańdarynyń kartasyna almastyrdy. Bul týraly 3 shilde kúni eki eldiń syrtqy ister ministrlikteri habarlady, dep jazady Azattyq.
Byltyr kúzde Ázerbaijan men Armeniia arasynda Taýly Qarabaq pen onyń ainalasyndaǵy aýmaq úshin alty aptalyq soǵys bolyp, onyń sońy Reseidiń araaǵaiyndyǵymen aiaqtaldy. Bitim kelisimi boiynsha, Baký Taýly Qarabaqtyń edáýir bóligi men sonyń ainalasyndaǵy jeti aýdandy qaitaryp aldy, daýly aimaqqa Reseidiń bitimger áskeri kirgizildi.
Ázerbaijan syrtqy ister ministrligi óz málimdemesinde tutqyndy kartaǵa almastyrý kelisimine Reseidiń uiytqy bolǵany jazylǵan. Kelisim boiynsha, Armeniia Baký qaramaǵyna ótken Fizýli jáne Zangelan aimaqtaryndaǵy 92 myń minanyń ornalasqan jeri belgilengen kartany berýi tiis. Bul minalar tanki men jaiaý áskerge qarsy qoiylǵan.
"Adamdyq amaly retinde Ázerbaijan Armeniiaǵa ulty armian 15 adamdy ekstraditsiialady" delingen málimdemede.
Sarbazdar eline qaitarylǵan soń, Armeniia olardyń aty-jónin atap, olardyń bári eldiń soltústigindegi Shirak oblysynyń týmasy ekenin aitty.
Maýsym aiynda Ázerbaijan men Armeniia osyǵan uqsas kelisim júzege asqan. Onda Baký 15 armian tutqynyn Aǵdam aimaǵyndaǵy mina alańdarynyń kartasyna almastyrǵan.
Biraq bitimnen keiingi kishigirim daý kezinde Ázerbaijan Armeniianyń 60 shaqty sarbazyn tutqynǵa alǵan. Máseleni qiyndatqany, Ázerbaijan qamaýǵa alynǵandardy soǵys tutqyny dep sanamai otyr. Jeneva konventsiiasy aiasynda soǵys tutqyndaryna erekshe mártebe berilgen.
