Búgin Ázerbaijan prezidentiniń 6 sáýirdegi «Tutqyndalǵan adamdarǵa raqymshylyq jasaý týraly» buiryǵyna sáikes sottalǵan azamattar túrmeden bosatylyp jatyr. Jalpy tizimde 65 jastan asqan 176 adam bar, dep habarlaidy "Ult aqparat".
Memleket basshysynyń resmi saitynda jariialanǵan qujatta álemde koronavirýs infektsiiasynyń taraǵanyna bailanysty densaýlyǵy men jasyn eskere otyryp erekshe kútimdi qajet etetin 65 jastan asqan azamattardy bosatý týraly sheshim qabyldanǵany aitylǵan. Sheshim shyǵarý barysynda olardyń densaýlyǵy, jazasyn óteý kezindegi tártibi negizge alynǵan.
Jalpy 176 adam bostandyqqa shyǵady. Olardyń ekeýi ómir boiyna sottalǵan azamat (biri 20 jylyn, ekinshisi 25 jylyn ótegen), jol-kólik oqiǵasyna qatysty qylmys jasaǵan 25 adam bar.
Sondai-aq, bul tizimge taratylǵan Ulttyq qaýipsizdik ministrligi Energetika jáne kólik qaýipsizdigi bas basqarmasynyń burynǵy bastyǵy general-maior Akif Chovdarov, Transulttyq ekonomikalyq qylmyspen kúres basqarmasynyń eks-bastyǵy general-maior Sýbahir Gýrbanov jáne Ázerbaijan Islam partiiasynyń atqarýshysy Faramaz Abbasov ilingen.
