Ázerbaijan Prezidenti Ilham Áliev QR Prezidenti Qasym-Jomart Toqaevqa jáne Qazaqstan halqyna Almaty qalasy mańynda bolǵan ushaq apatyna bailanysty kóńil aitty, dep habarlaidy "Ult aqparat".
«Almaty mańyndaǵy ushaq apaty saldarynan qaza tapqan adamdar týraly habardy zor kúizelispen qabyldadyq. Osy qaiǵyǵa bailanysty óz atymnan jáne Azerbaijan halqy atynan qaza bolǵandardyń otbasylaryna, týǵan-týystaryna qaiǵyryp kóńil aitamyn. Apattan zardap shekkender men jaralanǵandardyń tezirek saýyǵyp ketýine tilektespiz»,-delingen Ázerbaijan basshysynyń kóńil aitý habarlamasynda.
Qaiǵyly oqiǵa belgili bolǵannan keiin Ázerbaijandaǵy QR Elshiligine baýyrlas eldiń túrli saladaǵy ókilderinen, onyń ishinde qoǵamdyq-saiasi, isker top, sondai-aq qarapaiym jandardan kóńil aitqan habarlamalar túsken. Olar da zardap shekkenderdiń tezirek jazylyp shyqqandaryn tileidi.
Aita keteiik, keshe tańǵy mezgilde Almatydan Nur-Sultan qalasyna shyqqan ushaq radardan joǵalyp ketti.
Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy.
Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia bardy.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi.
