Ázerbaijan men Armeniia áskerleri arasynda qaqtyǵys oty tutandy. Bul týraly seisenbi, 13 qyrkúiektiń tańynda Resei aqparat agenttikteri habarlady. Qaqtyǵys daýly Taýly-Qarabaqqa qatysty ondaǵan jylǵa ulasqan shielenisti jandandyryp otyr.
2020 jyldyń kúzindegi alty aptalyq soǵys kezinde aýmaqty baqylaýyna alǵan Ázerbaijan óz sarbazdarynyń qaza tapqanyn málimdedi. Armeniia óz áskeriniń sapynda kisi qazasy bar-joǵyn aitpady, biraq qaqtyǵysy túni boiy júrgenin habarlady.
Erevan Reseimen áriptestik kelisimin júzege asyrýdy jáne Resei jetekshilik etetin Ujymdyq qaýipsizdik týraly shart uiymynan, BUU Qaýipsizdik keńesinen kómek suraitynyn málimdedi. Bul týraly "Interfaks" agenttigi habarlap otyr.
Eki tarap qaqtyǵys otynyń tutanýyna bir-birin aiyptady.
"Ázerbaijan qarýly kúshteriniń birqatar bekinisi Armeniia áskeri tarapynan túrli kalibrdegi oqtan atqylandy.
Saldarynan ásker sapynda qaza tapqandar bar jáne áskeri infraqurylymdarǵa nuqsan keldi", - dep keltirdi agenttik Ázerbaijan qorǵanys ministrliginiń sózin.
Ázerbaijan tarapynyń málimdeýinshe, Armeniia kúshteri shekara mańynda barlaý jumystaryn júrgizip, 12 qyrkúiek kúni ol jerge qarý-jaraq alyp barǵan, minalaý operatsiialaryn júrgizgen.
Baký óz shabýylynyń "tek áskeri nysanalardy kózdep jatqanyn" aitady.
Al Armeniia qorǵanys ministrligi "Atys Ázerbaijannyń arandatýynan keiin bastaldy" dep otyr. Armeniia qarýly kúshteri sol shamada qarymta shabýyl jasady" deidi.
Armeniia men Ázerbaijan arasynda Taýly Qarabaq tóńiregindegi shielenis 1980 jyldary, Sovet odaǵy ydyrai qoimaǵan tusta bastalǵan. Bul aýmaqta armian ultynyń ókilderi turǵan, biraq jer Ázerbaijanǵa tiesili bolǵan. Sol jyldardaǵy soǵys nátijesinde Armeniia Taýly Qarabaqtyń edáýir bóligin basyp alǵan.
2020 jyl kúzdegi alty aptalyq soǵysta Ázerbaijan sol jerlerdi qaitaryp aldy. Soǵys Reseidiń bitimger áskeriniń kirýimen aiaqtaldy.
Sodan beri eki el basshylary beibitshilik kelisimin jasasý maqsatynda birneshe ret kezdesken.
