Qazaqstannyń Ázerbaijandaǵy Elshiliginde túrki elderi sýretshileriniń uly qazaq aqyny shyǵarmalarynyń jelisimen salynǵan týyndylaryn qamtityn «Abaidy oqi otyryp» art-albomynyń tusaýkeseri ótti, dep habarlaidy "Ult aqparat".
Syrtqy ister ministrligi taratqan málimetke sensek, albomdy Abaidyń 175 jyldyǵyna orai Halyqaralyq túrki mádenieti uiymy (TÚRKSOI) shyǵarǵan bolatyn.
Tusaýkeserge TÚRKSOI Bas hatshysy Dúisen Qaseiinov, Halyqaralyq túrki mádenieti men murasy qorynyń prezidenti Giýnai Efendieva, Qazaqstan Elshisi Serjan Ábdikárimov, Ázerbaijan-Qazaqstan respýblikalyq dostyq qoǵamynyń vitse-prezidenti Eldar Ismailov, sondai-aq Ázerbaijannyń ǵylymi jáne shyǵarmashylyq toptarynyń ókilderi qatysty.
Kezdesýge qatysýshylardyń aldynda sóz sóilegen D. Qaseiinov Abai halyq aqyny, oishyl jáne qazirgi qazaq ulttyq ádebietiniń negizin qalaýshy bola otyryp, óz jurtyna ǵana emes, búkil túrki álemine de bai mura qaldyrǵanyn – onyń óleńderi men dana sózderi baýyrlas halyqtardyń mádeniet bailyǵy men rýhaniiatyn pash etetinin atap ótti.
Is-shara barysynda uly qazaq aqynynyń esimi men murasyn nasihattaýǵa úles qosqan tulǵalarǵa «Abai 175 jyl» estelik medali jáne qurmet gramotasy tapsyryldy.
Baký memlekettik ýniversiteti (BMÝ) janyndaǵy Abai atyndaǵy Qazaq tili, tarihy jáne mádenieti ortalyǵynyń jetekshisi Fatima Dýrsýnova, BMÝ túrkologiia kafedrasynyń meńgerýshisi Ramil Askarov, jýrnalist-pýblitsist Aida Eivazova, jazýshy Nariman Abdýlrahmanly, Ázerbaijan memlekettik pedagogikalyq ýniversitettiń ádebiet kafedrasynyń professory Elman Gýliev, BMÝ túrkologiia kafedrasynyń professory Firýza Agaeva marapattarǵa ie boldy.
Qonaqtarǵa Abaidyń ómiri men shyǵarmashylyǵy týraly derekti rolik kórsetilip, qazaqtyń dástúrli taǵamdary usynyldy.
