Foto: alataumarket.kz
Almaty ákimi Erbolat Dosaev baraholka bazary boiyna kólikterdiń beibereket toqtaýyna qatysty pikir bildirdi, - dep habarlaidy Tengrinews.kz saity.
Jetisý aýdanynyń turǵyndarymen kezdesýde almatylyqtardyń biri megapolis basshysyna júgindi. Ol aqshany únemdeý maqsatynda ámbebap bazarlardyń aqyly turaǵyna kirmei, Soltústik ainalma tasjoly boiyna toqtap, kólikterin qoiatyn júrgizýshilerge shara qoldanýdy surady.
"Soltústik ainalma joldyń boiynda Jumabaev kóshesinen Kókmaisa yqshamaýdanyna deiin tórt bazar ornalasqan: "Kenjehan", "Qazyna", "Arlan" jáne "Alash". Byltyr bul tasjolǵa jóndeý jumystary júrgizilip, bordiýrler ornatyldy. Biraq qazir júrgizýshiler birinshi jolaqtan turaq jasap alǵan: 200 teńge únemdeidi, bazardyń turaǵyna kirmeidi. Osyǵan bailanysty bul kóshede únemi keptelister bolady", - dep ashýlandy er adam.
Buǵan jaýap retinde Erbolat Dosaev politsiia men tsifrlandyrý qyzmetkerlerine erteńnen bastap shara qoldanýdy tapsyrdy. Atap aitqanda, politseiler belgilengen aýmaqty tańerteń jáne keshke tekserip, ákimdik qyzmetkerleri ol jerge "Sergek" kameralaryn ornatýy kerek.
"Arystanǵani Rasylhanuly (Zapparov - Almaty Politsiia departamentiniń bastyǵy - esk.) bóleiik. Men qazir tapsyrma beremin, kórsetilgen aýmaqqa bir "Sergek" kamera keshenin ornatyńyz. Taksi júrgizýshileri ol jerde avtoturaq jasap alsa, endi azdaǵan aiyppul tólesin.
Aqsha bar dep oilaimyn, aldaǵy eki aida kameralar ornatamyz. Sondai-aq, taksi júrgizýshilerimen jumys júrgizińizder. Jergilikti politsiia qyzmeti nege jumys istemeidi? Tańerteń jáne keshke bir patrýl kóligin sonda qoiyńyzdar. Báribir qalany aralap júredi, aiyrmashylyǵy nede. Erteńnen bastap patrýl qoiyńyz, "Sergek" ornatylǵannan keiin patrýldi alyp tastaýǵa bolady", - dedi Almaty ákimi.
