Parlament Senatynyń depýtaty Áli Bektaev QR Prezidenti Qasym-Jomart Toqaevtyń «Egemen Qazaqstan» gazetinde jariialanǵan «Táýelsizdik bárinen qymbat» atty maqalasyna qatysty pikir bildirdi, dep habarlaidy "Ult aqparat".
«El Prezidenti Qasym-Jomart Toqavtyń «Táýelsizdik bárinen qymbat» atty maqalasyn oqyp shyǵyp, egemendigimizdi, memlekettigimizdi nyǵaitý úshin ne isteýimiz kerek degen saýalǵa jaýap aldyq. Otyz jylda elimiz memlekettik nyshandaryn belgilep, bilik júiesin qalyptastyrdy, ulttyq valiýtamyz ainalymǵa endi, Qarýly Kúshterimiz quryldy, Ata zańymyz qabyldandy, shekaramyz shegendeldi, elimiz bedeldi halyqaralyq uiymdarǵa múshe boldy. Bir sózben aitqanda, Qazaq eli ulttyq salt-dástúrin, tilin, dinin, dilin jańǵyrtyp, ósip-órkendep, mereili memleketke ainaldyq.
Osynaý tolaǵai tabystardyń bárinde Elbasynyń dara kóshbasshylyǵy men halqymyzdyń danalyǵy men parasaty, birligi men yntymaǵy, otandastarymyzdyń qajyrly eńbegi jatqanyn atap ótti. «Sondyqtan, Elbasy Táýelsizdigimizdiń máńgi simvolyna ainaldy desek, aqiqatty aitqan bolar edik» dep tuǵyrly tulǵanyń el tarihynda alar ornyn aiqyndap berdi» - dedi senator.
Onyń sózine qapaǵanda, Memleket basshysy aldaǵy on jyldaǵy mindet – qýatty eldiń iesi jáne kemel halyq bolý ekenin basa aitty. Bul jolda saiasi-ekonomikalyq reformalardy jáne sanany jańǵyrtý úderisin jalǵastyryp, zaman talabyna beiimdelgen ulttyń jańa bolmysyn qalyptastyrýymyz qajet. Ult pen el retinde saqtalyp qalý úshin búgingi jáne bolashaq urpaq jańa syn-qaterlerge daiyn bolýy kerek. Ol úshin óskeleń urpaq Táýelsizdiktiń qadirin bilýi qajet. Azattyq bizge ońailyqpen kelgen joq. Táýelsizdik taǵdyrdyń bere salǵan syiy emes. Túptep kelgende, qazaqtyń tarihy – azattyq jolyndaǵy kúreske toly tarih. Táýelsizdikke qol jetkizý ǵana emes, ony ustap turýdyń áldeqaida qiyn ekendigine memleketterdiń tarihtary dálel.
«Sonymen qosa, el Prezidenti óziniń maqalasynda mańyzdy tapsyrma júktedi, ol – Qazaqstannyń akademiialyq úlgidegi jańa tarihyn jazýdy dereý bastaý. Ol úshin talai aqtańdaqtardyń betin ashyp, burmalanyp kelgen derekterdi túzetý qajet. Bul iske elimizdiń eń myqty tarihshylary tartylmaq. Sonymen qatar, Qazaqstannyń qysqasha tarihy álemniń negizgi tilderine aýdarylatyn bolady. Memleket basshysy osy maqalasynda Qazaqstannyń egemendigine, aýmaǵynyń tutastyǵyna kúmán keltirýshi jat nietti saiasatkerlerdiń arandatýshylyq sandyraq áńgimelerine naqty jaýap qaitardy.
Qazaq úshin ejelden Jer, Til, El birligi – eń qasterli uǵymdar deitin bolsaq, Memleket basshysy osynaý maqalada: «Jerge bailanysty bárimiz aiqyn biletin jáne buljymaityn aqiqat – qazaqtyń jeri eshbir sheteldiktiń menshigine berilmeidi, eshqashan satylmaidy. Osyny ár azamatymyz sanasyna berik sińirýi qajet. Kelesi jyly Jer kodeksiniń jekelegen normalaryna qatysty engizilgen moratoriidiń merzimi aiaqtalady. Aýyl sharýashylyǵy maqsatyndaǵy jerlerdi ainalymǵa engizip, halyqtyń igiligine jaratý – óte mańyzdy másele. Sondyqtan, biyl Jer máselesi jónindegi komissiiany quryp, sonyń aiasynda bir bailamǵa kelgen jón. Qazaq úshin toqymdai jerdiń ózi qymbat, bir ýys topyraqtyń ózi altyn», - dep qadap aityp, nyq senimde bolý kerektigin uǵyndyrdy», - dedi depýtat.
Sonymen qatar Á Bektaev Prezident qazaq tiliniń mártebesi jaiynda da sóz qozǵaǵanyn eske saldy. Memlekettik tildi bilý – Qazaqstannyń árbir azamatynyń paryzy dep te aitýǵa bolady. Osy oraida barsha qazaqstandyqtarǵa, onyń ishinde qazaq tilin áli jete meńgermegen otandastarymyzǵa úndeý tastady.
«Sońǵy kezde qazaqstandyqtar qoǵamdyq ómirge, saiasi úderisterge belsendi aralasyp keledi. Prezidenttiń «Halyq únine qulaq asatyn memleket» tujyrymdamasy men Ulttyq qoǵamdyq senim keńesi – osynyń aiǵaǵy. Saliqaly saiasi reformalar Qazaqstannyń saiasi júiesi zaman talabyna sai damyp kele jatqandyǵyn kórsetedi», - dedi senator.
«Rasynda da, Táýelsiz el bolý ony jariialaýmen shektelmeidi. Táýelsizdik úshin naǵyz kúres kúndelikti eńbekpen, úzdiksiz ári dáiekti eldik saiasatpen máńgi jalǵasady. Memleket basshysy aitqandai, biz qýatty táýelsiz memleketimizben ǵana ult retinde jer betinde saqtalamyz. Memleket basshysynyń búgingi oi tolǵanysy meni tereńnen terbedi. Búginimizdiń bekem, keleshegimizdiń kemel bolatynyna bek senimdimin», - dedi Áli Bektaev.
