Azamattyq qyzmetshilerdiń jekelegen sanatynyń jalaqysyn kezeń-kezeńimen arttyrý úshin Úkimet qaýlysynyń jobasy ázirlenedi. Bul týraly Úkimet otyrysynda QR Eńbek jáne halyqty áleýmettik qorǵaý ministri Serik Shápkenov aitty, dep habarlaidy QazAqparat.
«Memleket basshysy jariia etken bastamalarǵa sáikes eńbekaqy tóleýdi arttyrý boiynsha kelesi is-sharalar qabyldanady. Birinshi, 2022-2024 jyldarǵa arnalǵan respýblikalyq biýdjet týraly zań jobasyna 2022 jylǵy 1 qańtardan bastap eń tómengi jalaqyny 60 myń teńge mólsherinde belgileý týraly norma engiziledi. Atalǵan is-shara ekonomikanyń barlyq salasynda jumys istetin 1 mln 650 myń jaldamaly qyzmetkerdiń aqshalai tabysynyń artýyna alyp keledi. Bul sondai-aq razriadaralyq biliktilik júiesin eskere otyryp, basqa da qyzmetkerlerdiń kiristerin arttyrýǵa múmkindik beredi», - dedi ministr.
Onyń aitýynsha, ekinshiden, azamattyq qyzmetshilerdiń jekelegen sanatynyń jalaqysyn kezeń-kezeńimen arttyrý úshin Úkimet qaýlysynyń jobasy ázirlenedi.
«Nátijesinde 2022 jyldan bastap olardyń jalaqysy ortasha eseppen jyl saiyn 20 paiyzǵa artyp, 2025 jylǵa qarai eki esege ulǵaiady. Eń tómengi jalaqy kelesi jyldan bastap 49 myńnan 60 myń teńgege deiin nemese 22 paiyzǵa ósedi», – dedi ministr.
Sonymen qatar Memleket basshysynyń áleýmettik masyldyqty tómendetýge jáne muqtaj jandarǵa kómek kórsetýge qatysty tapsyrmalary ázirlenip jatqan Áleýmettik kodekste eskeriletinin aitty.
