Ishki ister ministrligi azamattarǵa qarsy kúsh qoldanýdyń árbir faktisin muqiiat tekseredi. Bul týraly vedomstvonyń resmi ókili Nurdildá Oraz málimdedi, dep habarlaidy QazAqparat.
«IIM azamattarǵa qatysty kúsh qoldaný faktilerine basa den qoiady. Árbir fakt politsiia ǵimarattarynda jáne qoǵamdyq oryndarda ornatylǵan beinekameralardy taldaý arqyly muqiiat zertteledi», - dedi ol ministrliktiń aqparat alańynda ótken brifingide.
Buǵan deiin tártipsizdikter kezinde jaraqat alǵan 23 adam kúzetiletin palatalarda em alyp jatqany aitylǵan edi.
«Qańtar aiynda bolǵan jappai tártipsizdikter kezinde politsiia kúshteri men áskeri qyzmetshiler elde quqyqtyq tártipti ornatý boiynsha aýqymdy operatsiialar júrgizdi. Tergeý izoliatorynyń ishki tártip qaǵidalaryna sáikes, ýaqytsha ustaý izoliatoryna túsken barlyq adamdar COVID-19 virýsyna PTR-testeriniń teris nátijesimen qabyldanady jáne mindetti túrde meditsinalyq tekserýden ótedi. Dene jaraqattary nemese aýrýlary anyqtalǵan kezde olarǵa dereý meditsinalyq kómek kórsetilýde. Árbir osyndai fakt týraly prokýratýra organdaryna habarlanady. Mekemede bilikti meditsinalyq kómek kórsetý bolmaǵan jaǵdaida olar azamattyq densaýlyq saqtaý uiymdaryna jetkizilip, kúzetiletin palatalarda emdeledi. Búginde osyndai tártippen 23 adam em alýda», - degen bolatyn Nurdildá Oraz.
