2026 jylǵy 17 shildede Qazaqstandyq qoǵamdyq damý institýty «2026 jylǵy elektoraldyq landshaft jáne sailaý tendentsiialary: qoǵam ne kútedi» taqyrybynda «Sarap» sarapshylar klýbynyń otyrysyn ótkizdi. Bul týraly Qazaqstandyq qoǵamdyq damý institýtyna silteme jasap ult.kz habarlaidy.
Is-sharaǵa sarapshy-akademiialyq qaýymdastyq ókilderi, ǵylymi-zertteý institýttary men taldaý uiymdarynyń basshylary, jetekshi joǵary oqý oryndarynyń doktoranttary men magistranttary qatysty.
Qatysýshylar jańa Konstitýtsiia jaǵdaiynda Quryltai sailaýy qarsańyndaǵy qoǵamdyq úmit, partiialyq qurylymdar róliniń kúsheiýi jáne azamattardyń sailaý úderisterine qatysý belsendiliginiń artýyn talqylady.
Otyrys barysynda QQDI-diń eki zertteýiniń nátijeleri tanystyryldy: «2026 jyldyń II toqsanyndaǵy qoǵamdyq-saiasi ahýal» (2 400 respondent) jáne «Qazaqstandyqtardyń saiasi baǵdarlary» (1 200 respondent).
Bir-birine táýelsiz júrgizilgen eki zertteýdiń kórsetkishteri ózara sáikes nátijelerdi kórsetip, elektoraldyq kezeńniń joǵary qoǵamdyq konsolidatsiia, optimizm jáne memlekettik institýttarǵa degen turaqty senim jaǵdaiynda bastalǵanyn kórsetedi.
Alǵashqy zertteý derekterine sáikes, qazaqstandyqtardyń 84,1%-y eldegi qoǵamdyq-saiasi ahýaldy qolaily nemese turaqty dep baǵalaidy. Bul I toqsandaǵy 70,4% kórsetkishten edáýir joǵary.
Saýalnama qoǵamdaǵy optimistik kóńil kúidiń nyǵaiǵanyn kórsetedi. Óz kóńil kúiin óte jaqsy nemese birqalypty dep baǵalaǵan azamattardyń úlesi 88,5%-ǵa deiin artsa, alańdaýshylyq sezinetinderdiń úlesi 15,2%-dan 11,5%-ǵa deiin tómendegen. Ómirge qanaǵattaný deńgeii 85,8%-ǵa jetti.
Respondentterdiń jartysynan astamy (50,5%) sońǵy bir jylda otbasynyń materialdyq jaǵdaiy jaqsarǵanyn atap ótti. Al aldaǵy bir jylda oń ózgerister kútetinderdiń úlesi 60,1%-ǵa deiin artty.
Jastardyń oń kózqarasy aiqyn ári ornyqty. 18-28 jas aralyǵyndaǵy qazaqstandyqtardyń 87,1%-y eldegi qoǵamdyq-saiasi ahýaldy qolaily nemese turaqty dep baǵalaidy. Bul barlyq jas toptary arasyndaǵy eń joǵary kórsetkish. Sonymen qatar, jastar bolashaqqa barynsha optimistik kózqaras tanytady: jas respondentterdiń 65,6%-y aldaǵy bir jyl ishinde óz ómiriniń jaqsaratynyn kútedi.
Memlekettik institýttarǵa degen senimniń qarqyndy ósýi baiqalady. 2026 jyldyń II toqsanynda Prezidentke degen senim deńgeii 86,9%-dy qurady. Bul kórsetkish barlyq jas toptaryna tán, iaǵni qoǵamdyq qoldaýdyń keń aýqymdy ekenin jáne onyń jekelegen áleýmettik-demografiialyq sanattarmen shektelmeitinin kórsetedi.
Óz kezeginde, «Qazaqstandyqtardyń saiasi baǵdarlary» zertteýiniń nátijeleri boiynsha respondentterdiń 75,1%-y aldaǵy Quryltai sailaýyna qatysýǵa daiyn ekenin málimdedi. Saýalnamaǵa qatysqandardyń 37,6%-y sailaýǵa qatysýǵa nyq nietti ekenin bildirse, taǵy 37,5%-y «Iá deýge bolady» degen jaýapty tańdaǵan, iaǵni olar sailaýǵa yqtimal túrde barýǵa daiyn.
Sailaýǵa qatysýǵa daiyndyqtyń eń joǵary deńgeii aǵa býyn ókilderi arasynda baiqalady (80,7%), al jastar arasynda bul kórsetkish 69,4%-dy quraidy. Joǵary bilimi bar azamattar men aýyl turǵyndary da sailaýǵa qatysýǵa joǵary deńgeide daiyn ekenin kórsetip otyr.
Otyrys qorytyndysy boiynsha qatysýshylar aldaǵy Quryltai sailaýy eldiń saiasi júiesi damýynyń jańa kezeńine jol ashatynyn atap ótti. Ol Qazaqstandaǵy ókildi bilikti odan ári institýttandyrý perspektivalaryn aiqyndaityn qoǵam zor úmitpen kútetin negizgi oqiǵalardyń biri.
Qazaqstandyq qoǵamdyq damý institýty sailaý naýqany kezeńinde qoǵamdyq pikirge saýalnamalar júrgizý úshin Qazaqstan Respýblikasynyń Ortalyq sailaý komissiiasynda akkreditatsiiadan ótken.
