Sulýlyqtyń naqty bir ólshemi joq sekildi, poeziianyń da qalypqa salynǵan anyqtamasy joq. Ár aqynnyń álemdi qabyldaýy ám oi qorytýy ózinshe bólek. Oǵan qarap «óleń mundai bolýy» kerek dep belgili bir formýla nusqaýdyń qajeti shamaly. Eń bastysy, ózin óleńnen izdep kelgen jastyń asqaq armandaryna kóleńke túspeýi kerek. Óitkeni, búgingi baǵytsyz «básekeniń» aqyr sońynda asyl ónerge degen eń uly mahhabbat jeńip shyǵary talassyz!..
Qyzyq, aqyndyǵy alty óleńmen baǵalanǵan on jetidegi essiz sezim otyz jetige kelgen kezde joqqa ainalsa qaitpeksiz?! Eger Táńir talaiyńdy sózge bailasa, halyqqa kerek tátti óleńdi de tańdaiyńa salyp beredi. Al, óleńmen ómir uiqaspasa áńgime basqa.
Azamat asylzat ónerdiń shyn baǵasyn seze alady, sezine alady. Sol úshin de uly sapardyń jolaýshysy bolýǵa anyq bekingen. Jalǵyzdar saparynda oljaly bop oiǵa shyǵa ma, teńge ilip tórge oza ma, altyn alyp aiǵa shaba ma – ol Ýaqyt degen talǵamdy tóreshiniń enshisinde!.. Sátti bolǵai!
Sherhan Talap
***
Ne aitaiyn, ne deiin taǵdyrǵa men?
jalǵyzdyqty dál bulai án qylmap em.
Elesińdi izdeimin eski baqtan,
Janarymda irkilip jańbyrly álem...
Men bildim be ómirdiń kereǵaryn,
Burynǵydai bolmaidy nege, janym?
Bárin, bárin shegershi keiin qarai,
Ózgertýge ómirdi kele me áliń?
Sol ómirge durys pa kóne salý?
(Gúlge saýsaq sozady nege sáýir?)
...Ómir degen - bireýge ólý ǵana,
Ómir degen - bireýdi kóme salý.
Amal tappai, qurydym taǵdyrǵa men.
Sor, muńymdy dál bulai án qylmap em.
Kóshe boilap taǵy da qańǵyp júrmin,
Qaida ketti, biz keshken sol bir dáýren?
Qaida áketip barady dúrmek mynaý?
Dúrmek myna bizsiz de gúldep tur-aý.
...Aryla almai júrgende kúz muńynan
Kóktem kelip qalǵanyn bilmeppin-aý...
Qandai jaqsy...
Kúrsinispen kóp ótken túnderdi aiap,
ókinishpen kóp ótken kúnderdi aiap,
Saǵynyshpen sarǵaiyp sýret salam,
Jalǵyzdyqtyń janaryn muńmen boiap.
Syltaý etip qaitesiń el sybyryn.
Ózgege emes ózime senshi, kúnim!
Súiý degen - kim bilgen, súigenińniń
Bilmeý shyǵar, bilseń de kemshiligin!..
Aitar ánin umytyp mol baǵymyz.
Kóktem bolǵan bir kezde joldaǵy kúz...
Bári "aqyldy" bop ketken bu ǵasyrda,
Qandai jaqsy aqymaq bolǵanymyz.
Janym!
Sensiń janym...
Muńaiasyń janaryńdy monshaq qyp,
bir ózińde men izdegen myń shattyq.
Ókindirgen ókinishter ótkinshi,
qýanyshtyń barlyǵy da bir sáttik!
Sen ańsasań bóten samal, basqa lep,
sonyń bári tireledi jasqa kep.
Saǵan jazǵan jyrlarymdy basqa qyz
armandaidy maǵan arnap jazsa dep.
Mahabbatty joq dese de bar álem
al men seni baqytyma balap em.
Taǵdyrymnyń táttiligin sezdirgen
Sensiń, janym, sodan keiin qara óleń!
Jalyqsam da myna jaryq bes kúnnen,
senen, kúnim, jalyqpaim dep sheshtim men.
Saǵan eshkim jetpeitini belgili
meni janym, salystyrma eshkimmen!
Muńaiasyń janaryńdy monshaq qyp,
bir ózińde men izdegen myń shattyq.
Ókindirgen ókinishter ótkinshi
qýanyshtyń barlyǵy da bir sáttik.
***
Jabyǵyp júrmin, jalyǵyp júrmin bárinen,
Jaraly bolǵan jalǵyzdyǵymnyń jaryǵy eń...
Munarly muńmen, manaýrap kókten jyl qusyn,
Qarsy aldym jalǵyz taǵy men.
Saǵyndym seni, saǵyndym seni, sen kúnim!
Jylýyn qimas jalǵan da meni jeńdi muń.
Balqadishasy buiyrmai ketken keshegi,
Aqan seridei sherlimin!
Súidirdiń, súidim, unattyń men de unaǵam,
Jyraq ta qalǵan júregim endi júr aman.
...Jalǵanda múmkin saǵynyp, ańsap júretin
Kerek te shyǵar bir adam.
***
Ótken kúnder oralmaidy - ólgen kún.
Men sen úshin bárine de kóngenmin.
Seni kúnim, jamandyqqa qiia almai
Qaita ainalyp keledi dep sengenmin.
Sengen edim...
Ótti bári.
Sát qalǵan...
Ne bar sende sol kezdegi shaqtardan?!
Kózimdegi kermek muńǵa ulasty
Ózimdegi ózim bilgen tátti arman!
Mensiz sezip qońyr kúzdiń salqynyn,
Muńaidyń ba, kúrsindiń be, jarqynym?!
Jalǵyzsyrap júrsiń-aý, sen jyraqta
Ózińdi oilap men de janym, jalqymyn.
Men de sendei sezimimnen jeńilgem
Men de sendei súiip turyp jeringem!
Bilý úshin kimniń qandai ekenin
Qandai ǵajap aqymaq bop kóringen.
Gúldei bolyp qushaǵyńdy jaiǵansha
Ókinish qoi ol ózge dep oilansa!
Ókinish qoi eń aiaýly adamyń
Jek kóretin adamyńa ainalsa!
Álsizdik
Janym-aý, sen ózgeniń baǵymysyń?
Bir synaqtyń bizderge bolýy shyn.
Kináńniń, aiybyńnyń bárin keshkem,
Sen meniń ómirimde qalý úshin.
Ańsarmyn, saǵynarmyn, jalyǵarmyn,
Ómiri osyndai-aý sory bardyń.
Dál sendei jaqynymnan aldanǵan soń,
Eshkimge shyn senbeitin bolyp aldym.
Aqyn em shiratylǵan sherden muńy,
Aqynnyń ardan ketse ólgendigi!
Mendegi pendelikti saǵynarsyń,
Sol jannyń jamandyǵyn kórgen kúni.
Bir sátte jat boldy ma myna qalpym?
Osylai ekeýmizdi synady ár kún.
Basqańa aiyrbastap ketkendigiń
Ol seniń álsizdigiń shyǵar bálkim..
Ult portaly
