Foto: twitter.com/PDChina
Qazaqstan Aýǵanstanǵa qutqarýshylar men gýmanitarlyq kómek jiberedi, dep habarlaidy "Ult aqparat" primeminister.kz saityna silteme jasap.
"Memleket basshysy Qasym-Jomart Toqaevtyń tapsyrmasyna sáikes Qazaqstan Respýblikasy Aýǵanstanǵa gýmanitarlyq kómek kórsetedi. Bul másele Úkimettik komissiianyń otyrysynda talqylandy.
Gýmanitarlyq kómek azyq-túlik taýarlary, shatyrlar, dári-dármekter, kiim-keshek jáne basqa da qajetti zattardan turady. Júkter jaqyn arada áýe jáne temirjol kóligimen jóneltiledi.
Sonymen qatar Aýǵanstanǵa úiindiler astynda qalǵan adamdardy qutqarý úshin TJM qutqarýshylary, sonyń ishinde kinolog mamandar jiberiledi" - delingen habarlamada.
Qazaqstan Aýǵanstanǵa biylǵy 7 qazanda Gerat provintsiiasynda bolǵan joiqyn jer silkinisteriniń saldaryn joiý maqsatynda qoldaý kórsetedi.
