Búgin, 10 qańtar – Qazaqstandaǵy Jalpyulttyq aza tutý kúni. Osynaý azaly kúnge orai QR Parlamenti Májilisiniń depýtaty Darhan Myńbai óz pikirin bildirip, «QazAqparat» HAA redaktsiiasyna joldaǵan jazbasyn jariialaimyz.
«Elimizdiń birqatar óńirinde bolǵan qaiǵyly oqiǵalardyń saldarynan ishki ister, áskeriler salasyndaǵy azamattarymyz ben beibit turǵyndardyń qazasyna bailanysty 10 qańtarda Jalpyulttyq aza tutý kúni jariialandy. Prezidenttiń tiisti jarlyǵy shyqty. Memleket basshysy Qasym-Jomart Toqaevtyń bul sheshimi – eldi sabyrlyqqa, imandylyqqa, aýyzbirshilikke shaqyrý sharasy. Yqylym zamannan san qiyndyq pen synaqty bastan keshirgen halqymyzdy qańtardaǵy qara quiyn qatty kúizeltti. Tótennen, bótennen kelgenderge tabalaýshy, elbuzarlar qosyldy. Halyqtyń jiǵan-tergeni shashyldy, yrys-nesibe rásýá boldy. Qalalarymyzǵa oiran salyndy, qan tógildi. Otan úshin árbir jannyń qazasy qasiretti. Kenetten qaiǵy arqalaǵan otbasylar men áýletterdiń barshasyna qaiǵyryp kóńil aitamyz.
Ult ustazy Ahmet Baitursynuly: «Asyqpańdar! Artymyzda qazy bar, Tergep talai súiekteriń qazylar. Qinamaidy abaqtyǵa japqany. Qiyn emes darǵa asqany, atqany. Maǵan aýyr osylardyń bárinen. Óz aýylymnyń itteri úrip, qapqany» degendei syn saǵatta ishten shyqqan jaýyzdaq, alaýyzdyq pen arandatýshylyq elge aýyr tidi. Álem nazaryna ilikken búlikshilik áreket Memleket basshysynan Konstitýtsiiaǵa sai ádilettilikti, salqynqandylyqty, jaýapkershilikti talap etti. Tiisti batyl qadamdar jasaldy, olar jalǵasatyn bolady. Osyndai shielenisti shaqta qiyndyqqa shydap, tózgen erdi, er eńbegin sezgen eldi tanydyq. Iá, bizge qazir sabyr qajet. Sabyr – senimniń arqaýy. Birlik kerek, ol – úmittiń, jaqsylyqtyń bastaýy. Osyndai qaiǵy-qasiretti tereń sezine otyryp, qoǵam jaýapkershiligin, meiirimi men aýyzbirshiligin airyqsha aitamyz. Óitkeni, bizdiń elimizdiń eń qymbat qazynasy – adam, onyń ómiri, quqyǵy men bostandyǵy. Biz qýanyshta da, qaiǵyda da birgemiz. Jaratqan ie marqumdarǵa – iman, tirilerge bereke bersin! Jamandyqty amandyq qana jeńedi. Ashyq aspanymyz endi eshqashan qara bult torlamasyn».
