Foto: © elements.envato.com
Az qamtylǵan otbasylardyń kommýnaldyq shyǵyndarynyń bir bóligi óteledi, dep habarlaidy "Ult aqparat" primeminister.kz saityna silteme jasap.
"Biyldan bastap energiia kózderiniń jabdyqtaryn keshendi jańǵyrtý, sondai-aq elektr, jylý, sýmen jabdyqtaý jáne sý tartý jelileriniń tozý deńgeiin tómendetý maqsatynda «Tarifti investitsiiaǵa aiyrbastaý» baǵdarlamasyn iske asyrý bastaldy. Bul apattar sanyn azaitýǵa jáne jalpy usynylatyn kommýnaldyq qyzmetterdiń sapasyn arttyrýǵa múmkindik beredi.
Búgingi tańda TKSh kásiporyndarynyń tarifter men investitsiialyq baǵdarlamalardy ózgertýge qatysty (jóndeý jumystary men qyzmetkerlerdiń jalaqysyn kóbeitý, qaraýsyz jatqan jelilerdi kútý jáne t.b.) 212 ótinimi bekitildi. Nátijesinde kommýnaldyq qyzmetter tarifteriniń ózgerýi 10-30%-dy qurady, munda tutynýshylar men kommýnaldyq qyzmetter múddeleriniń teńgerimi eskerilgen.
Bul rette halyqtyń áleýmettik jaǵynan az qamtylǵan toptarynyń kommýnaldyq qyzmetterge jumsalatyn shyǵyndardyń bir bóligi óteletin bolady. Mundai tetik memlekettik turǵyn úi kómegin kórsetý aiasynda kózdelip otyr" - delingen habarlamada.
Ol az qamtylǵan otbasylarǵa nemese azamattarǵa kommýnaldyq qyzmetter (jylý, elektr jáne sýmen jabdyqtaý, bailanys, lift qyzmeti jáne t. b.) shyǵyndaryn óteý úshin toqsan saiyn tólenedi. Basty shart – tólem alýshynyń menshiginde Qazaqstan aýmaǵynda bir ǵana baspana bolýy kerek nemese ol memlekettik turǵyn úi qorynan, jeke menshik turǵyn úi qorynan jergilikti atqarýshy organ jaldaǵan baspanany jalǵa alýshy (teń jalǵa alýshy) bolýy tiis.
Biyl Úkimet engizgen ózgeristerge sáikes, eger kommýnaldyq qyzmetterge jumsalatyn soma otbasynyń nemese azamattyń bir aidaǵy jiyntyq tabysynyń 10%-nan asatyn bolsa, turǵyn úi kómegi beriledi. Buryn bul kórsetkish ár óńirge bailanysty 2-20% aralyǵynda bolǵan. Bul rette ákimdikter ruqsat etilgen shekti deńgeidi 10%-dan tómendetýge quqyly.
Mysaly, eger otbasynyń nemese azamattyń bir aidaǵy jiyntyq tabysy 100 myń teńgeni, al kommýnaldyq qyzmetterge jumsalatyn shyǵyny 15 myń teńgeni (tabystyń 10%-dan astamyn) qurasa, onda azamattyń jergilikti biýdjet qarajaty esebinen ótem alýǵa quqyǵy bar.
"Úkimet bekitken túzetý bolashaq turǵyn úi kómegin alýshylardy qamtýdy keńeitýge jáne az qamtylǵan azamattarǵa qarjylyq júktemeni azaitýǵa baǵyttalǵan.
Jalpy sońǵy 4 jylda 174 myńnan astam abonentke turǵyn úi kómegi úshin jalpy somasy 5 mlrd teńge tólendi. Al osy jyldyń 6 aiynda 31 myń otbasyna 630,5 mln teńgege kómek kórsetildi.
Osylaisha, kommýnaldyq qyzmetter tarifteri kóterilgen jaǵdaida ótemaqy da ulǵaiady, iaǵni az qamtylǵan azamattardyń shyǵyndary ulǵaimaidy.
Turǵyn úi kómegin taǵaiyndaý úshin azamattarǵa turǵylyqty jeri boiynsha ákimdikke júginý qajet" - delingen habarlamada.
