Qazaly aýdanynyń ortalyǵy - Áiteke bi kenti men Qazaly qalasy biriktiriletin boldy. Bul jóninde Qyzylorda oblysy ákiminiń baspasóz qyzmeti málim etti.
Búgin Qyzylorda oblysynyń ákimi Qyrymbek Kósherbaev Qazaly aýdanynda arnaiy issaparmen bolyp, munda qurylys jumystarynyń barysymen tanysty.
Qazirgi tańda aýdan ortalyǵyn ulǵaitý jáne abattandyrý maqsatynda tiisti is-sharalar qolǵa alynyp otyr. Aýdan ortalyǵy - Áiteke bi kenti men Qazaly qalasyna biriktirý boiynsha jumystar júrgizilýde.
Aýdan ortalyǵy - Áiteke bi kentinde qazirgi tańda 40 myńǵa jýyq adam turady. Al Qazaly qalasynda 7 myńnyń shamasynda turǵyn bar. Aýdan ortalyǵy men Qazaly qalasynyń ara qashyqtyǵy - 12 shaqyrym.
«Eki eldi meken arasyn 11 gektar aýmaq bólip jatyr. Onda aldaǵy ýaqytta 24 kásipkerlik nysan salý josparlanyp otyr. Sondai-aq, Qazaly qalasynyń avtomobil jolyn qaita jańartý boiynsha jobalyq-smetalyq qujattamasy daiyndaldy», - deidi jergilikti mamandar.
Budan basqa, 600 oryndyq mádeniet úii men mekemeler qurylysy júrgizilýde, 250 oryndyq 12 eki qabatty turǵyn úi qurylysy jobasy daiyndaldy jáne jabyq bazar salýǵa jer ýchaskesi bólindi.
Sonymen qatar, búgin Qazaly aýdanynda memlekettik rámizder alańy ashyldy. Aýdandyq sot ǵimaraty da paidalanýǵa berildi.
