Bilim jáne ǵylym ministri Ashat Aimaǵambetov jańa oqý jylynyń birinshi toqsanynda dástúrli formatta mektepke baratyn «kezekshi synyptar» qandai tártipte oqitynyn túsindirip berdi, dep habarlaidy QazAqparat.
«Jańa oqý jylynda oqytý úrdisi qalai júrgiziletini týraly taiaýda ǵana sheshim qabyldaǵanymyzdy bilesizder. Sheshim mynadai: jańa oqý jylynyń I toqsanynda 1-11 synyp oqýshylary qashyqtan oqidy. Alaida keibir niýanstar bar. Atap aitqanda alys aýyldardaǵy shaǵyn jinaqty mektepterge dástúrli túrde oqýǵa ruqsat beremiz. Alaida ol aýyldardyń ózinde bizdiń balalar men pedagogtarǵa eshqandai qaýip bolmaýy tiis», - dedi Ashat Aimaǵambetov onlain konferentsiiada.
Bilim jáne ǵylym ministri ekinshiden bastaýysh synyptar úshin de dástúrli formatta oqý múmkindigi beriletinin jetkizdi.
«Qashyqtan oqytý formatynda erekshe qajettiligi bar, az qamtylǵan otbasylardyń balalarǵa ońai tie qoimaityny anyq. Úshinshi másele ainalyp kelip bastaýysh synyptardyń oqytý jumysyna tireledi. Sol sebepti «kezekshi synyptar» degen engizildi. Ol ne? Bastaýysh synypta (1-4 synyp) oqityn balasy bar ata-ana balasyn dástúrli túrde mektepte oqytýǵa ótinish bere alady. Onda oqýshylarǵa ondai múmkindikti berýge daiynbyz», - dedi ol.
Ashat Aimaǵambetov mektepte dástúrli oqý barysynda naqty shekteý sharalary qandai bolatynyn aityp ótti.
«Birinshiden sanitarlyq-epidemiologiialyq talaptar qatań saqtalýy kerek. Ádette bir synypta 20-25, tipti úlken qalalarda 40 balaǵa deiin otyrady. Osyǵan bailanysty ata-analarynyń ótinishimen I toqsanda dástúrli formatta oqityn synyptaǵy kabinette 10-15 baladan artyq otyrmaýy kerek. Iaǵni bir synyptyń ózi toptarǵa bólinedi. Ekinshiden osy synyptarǵa qońyraýlar ártúrli ýaqytta soǵylady. Úshinshiden dene qyzýy turaqty túrde ólshenip, balalardyń densaýlyǵy qatań baqylaýǵa alynady. Ata-analarǵa mektep aýmaǵyna kirýge tyiym salynady. «Bir muǵalim – bir synyp» qaǵidaty engiziledi. Ádette aǵylshyn pánin oqytarda basqa muǵalim keledi. Alaida bul jerde ondai bolmaidy. Bastaýysh synyptyń muǵalimi ǵana sabaq ótkizedi. Dástúrli formatta oqytýǵa bolady degen kúnniń ózinde sabaqtyń jartysyn biz qashyqtan oqytý formatyna aýystyramyz. Aǵylshyn tili máselen qashyqtan oqytylady», - dedi ol.
Bilim jáne ǵylym ministri I toqsanda dástúrli formatta oqityn balalar úshin mekteptegi ashana jumys istemeitinin jetkizdi.
