QR Bilim jáne ǵylym ministri Ashat Aimaǵambetov Jambyl oblysyndaǵy vaktsina shyǵaratyn zaýyt qurylysy jóninde aityp berdi, dep habarlaidy QazAqparat.
«Jambyl oblysyndaǵy zaýyt boiynsha qurylys júrip jatyr jáne óńir ákimdigi birneshe ret aqparat berdi. Erejege sáikes biz Bilim jáne ǵylym ministrligi retinde zaýyttar salý, dárilik preparattar, vaktsinalar shyǵarý boiynsha quzyretimiz joq, sondyqtan zańnamaǵa sáikes zaýytty da ózimiz sala almaimyz. Sondyqtan bul qarajat Jambyl oblysynyń ákimdigine berildi. Qazirgi ýaqytta Jambyl oblysynyń ákimdigi tapsyrys berýshi retinde konkýrs ótkizip, jobalyq-smetalyq qujattama daiyndap, atalǵan qujatqa memlekettik saraptama aldy. Budan ári merdigermen shart jasasyp, zaýyt salýdy bastady», - dedi ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, qazir qurylys-montajdaý jumystary aiaqtaldy. Jabdyqtary shamamen 100% jetkizilgen.
«Bizdiń aldymyzda úlken mindet tur – jalpy zaýyttyń ózi GMP joǵary talaptaryna sai kelýi tiis: taza ǵimarattar, arnaiy talaptar, aldyn ala validatsiiaǵa, vaktsinanyń turaqtylyǵyna, tańbalaýǵa qoiylatyn talaptar bar. Osyǵan bailanysty zaýytty iske qosý aldynda aýqymdy jumys júrgizý qajet, ony qazir Jambyl oblysynyń ákimdigi men merdiger júrgizedi», - dep túsindirdi Ashat Aimaǵambetov.
