Bilim jáne ǵylym ministri Ashat Aimaǵambetov televiziialyq sabaqtardyń túsirilimine qatysqan pedagogtermen qorytyndy onlain-kezdesý ótkizip, muǵalimderge úzdiksiz oqý úrdisin uiymdastyrǵandary úshin alǵys aitty, dep habarlaidy "Ult aqparat" QR BǴM baspasóz qyzmetine silteme jasap.
«Juqtyrý qaýpine, barlyq qiyndyq men tiisti tájiribeniń joqtyǵyna qaramastan, sizder osy jumyspen ainalysýǵa kelistińizder. Sol úshin sizderge alǵysymdy bildiremin. Syrt kózben qaraǵan adamǵa beinesabaqtardy túsirý ońai bolyp kórinýi múmkin. 20 jyl tájiribesi bar muǵalim úshin telesabaq túsirýde qandai qiyndyq týyndaýy múmkin deitinder de bar, biraq bul – múldem basqa jumys. Shyn máninde, kamera aldynda sóilegenge qaraǵanda, úirenshikti synypta 25 balanyń aldynda sabaq túsindirý áldeqaida ońaiyraq», – dedi óz sózinde Ashat Aimaǵambetov kezdesý barysynda.
Jalpy IV toqsanda qazaqstandyq telearnalar arqyly 3 myńnan astam telesabaq kórsetildi. Qazirgi tańda taǵy 15 myń beinesabaq daiyndalǵaly otyr. Olar densaýlyq jaǵdaiyna bailanysty úide oqityn oqýshylar úshin nemese aýa raiynyń qolaisyzdyǵyna bailanysty sabaq toqtatylǵan jaǵdaida qosymsha material retinde paidalanylady.
«Eldegi epidemiologiialyq jaǵdaiǵa bailanysty IV toqsan boiy qazaqstandyq oqýshylar qashyqtan bilim alýǵa májbúr boldy. 16 naýryzda oqý jylyn aiaqtaý týraly usynystar kóp boldy. Oqýshylardy shilde aiyna deiin uzaq demalysqa jiberýdi, al oqý protsesin jazdyń sońyna qarai jalǵastyryp, kelesi oqý jylyn birden bastap ketý boiynsha da usynystar kelip tústi. Degenmen biz oqýdy toqtatpaýǵa jáne ony qashyqtan oqytý formatynda jalǵastyrýǵa sheshim qabyldadyq. Biz tehnikalyq múmkindikterge, halyqaralyq tájiribeni zerdeleýge súiene otyryp, belgili bir strategiiany tańdadyq. Bul oqytý formatyna amalsyzdan kóshtik», – dep atap ótti Ashat Aimaǵambetov.
QR BǴM basshysy eger epidemiologiialyq jaǵdai jaqsarsa 1 qyrkúiekte mektepter dástúrli oqytý formatyna oralatynyn aitty. Alaida kez kelgen jaǵdaiǵa daiyn bolý qajet.
«Maqsatqa jetýde komandalyq jumystyń mańyzy zor. Biz – Bilim jáne ǵylym ministrinen bastap qatardaǵy muǵalimge deiin bir komanda bolyp kettik. Túsirilimniń alǵashqy kúni Ashat Qanatuly stýdiiaǵa keldi de, kameranyń aldynda qobaljyp turǵan bizge qoldaý bildirdi. Mine, búgin biz osy úlken istiń nátijesin kórsetip otyrmyz. Ótkenge kóz júgirtsek, Qazaqstanda qashyqtan bilim berýdiń negizi jańadan qalandy dep aitýǵa bolady. Endi bir komanda bolyp birge damytatyn jáne ári qarai júzege asyratyn keremet dúnieniń irgetasy qalandy. Bizge senim artqanyńyz úshin raqmet», – dep pedagog Natalia Orehova ministrge alǵysyn bildirdi.
Onlain-kezdesý barysynda Bilim jáne ǵylym ministri birqatar pedagogti qurmet gramotasymen, «Y.Altynsarin» jáne «Bilim berý salasynyń qurmetti qyzmetkeri» qurmet belgilerimen marapattady.
Sondai-aq, Ashat Aimaǵambetov pedagogterdi qajetsiz esep berý men ózderine tán emes mindetterden bosatatyn buiryqqa qol qoiǵan bolatyn.
