Qazaqstanda úzdiksiz oqý tujyrymdamasy ázirlenip jatyr. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«PIAAC zertteýine biz birinshi ret qatysyp otyrmyz. Al negizgi qatysýshylary damyǵan memleketter ekeni belgili. Biraq, Qazaqstan ádeii qatysty. Bizge osy problemalardy belgilep alý mańyzdy. Kei memleketter mundai zertteýge tek astanalaryn ne iri qalalaryn qatystyrady. Biz aýyldyń da, qalanyń da turǵyndaryn tiisti ádisteme boiynsha birdei nátije alý úshin qatystyrdyq. Sondyqtan bul naqty nátije sanalady», - dedi Ashat Aimaǵambetov ministrliktiń apparat keńesi barysynda.
Sonymen qatar ol elimizde úzdiksiz oqý tujyrymdamasy ázirlenip jatqanyn aitty
«Aýrýyn jasyrǵanǵa ne bolatynyn bilemiz. Sondyqtan osyndai problemalardy tanyp, olar boiynsha naqty sheshimder qabyldaý biz úshin óte mańyzdy. Sol sebepti osyndai apparat keńesterinde halyqaralyq zertteýlerdiń nátijelerin, ásirese salystyrmaly zertteýlerdiń saraptamalyq aqparattaryn berip otyramyz. Mundai aqparat naqty sheshim qabyldaý úshin qozǵalady. Ómir boiy oqý, úzdiksiz oqý tujyrymdamasyn daiyndaý boiynsha Memleket basshysy Qasym-Jomart Toqaev óz Joldaýynda beker aitqan joq. Bul biz úshin mańyzdy máseleniń biri. Qosymsha bilim berýdi damytý, jalpy úzdiksiz oqý máselesin damytý, formaldy emes bilim berý nátijelerin taný óte mańyzdy bolyp otyr. Sondyqtan biz atalǵan tujyrymdamany daiyndap jatyrmyz», - dedi ol.
Ministrdiń aitýynsha, tujyrymdamany daiyndaý jumysyna joǵary oqý oryndary, ǵylymi-zertteý institýttary belsene qatysýy kerek.
