QR Bilim jáne ǵylym ministri Ashat Aimaǵambetov úide oqyǵysy kelmeitin oqýshy Nurislamnyń videosyna pikir bildirdi, dep habarlaidy QazAqparat.
Áleýmettik jelide Nurislam esimdi uldyń mektepke barǵysy keletini, anasynyń sabaqty «durys túsindirmeitini» týraly video taraǵan edi.
«Pedagog retinde bul videony júregime jaqyn qabyldadym. Nurislamǵa anasynyń ony jaqsy kóretinin, tek qana jaqsylyq tileitinin jáne sol úshin jaqsy oqyǵanyn qalaitynyn aitqym keledi. Anaǵa renjýdiń qajeti joq. Onyń tilin alyp, renjitpeýge tyrys», - dep jaýap berdi ministr Ortalyq kommýnikatsiialar alańyndaǵy brifingte tilshi saýalyna.
Sonymen birge, ministr Nurislam sekildi myńdaǵan balalardyń ustazy men synyptastaryn saǵynyp júrgenin aitty.
«Munyń barlyǵy elimizde saǵynýǵa turarlyq tamasha pedagogtardyń bar ekenin kórsetedi. Biz olardy qadirlep, baǵalaýymyz qajet. Balalarǵa aitarym, qazir kóp oqý kerek. Sabaqty toqtatpaimyz, kún saiyn muǵalimmen jáne synyptastarmen bailanysta bolý úshin jaǵdai jasaimyz. Sender ata-ana men ustazdardy tyńdańdar. Qoldy sabynmen jii jýyp, jaqsy tamaqtanyp, jańa oqý kezeńine ázirlenińizder», - dedi A. Aimaǵambetov.
Buǵan deiin ministr qazaqstandyq mektep oqýshylarynyń teledidar, radio, internet jáne poshta arqyly bilim alatynyn málimdegen edi.
1 sáýirde Qazaqstannyń barlyq mektepteri qashyqtan oqytý boiynsha synama sabaq ótkizedi.
Barlyq suraqtar boiynsha Bilim jáne ǵylym ministrliginiń 1450 koll-ortalyǵyna habarlasýǵa bolady.
