Foto: Tengrinews.kz/Týrar Kazangapov
Májilis depýtaty, burynǵy bilim ministri Ashat Aimaǵambetov mektepterde oqý jylynyń 31 mamyrǵa deiin uzarǵanyna qatysty túsinikteme berdi, dep habarlaidy Sputnik Qazaqstan.
"Biz jumysta tek qana unaityn, qol soǵatyn sheshimderdi ǵana qabyldamaýymyz kerek. Olai bolsa, bul tek popýlizm bolady. Árine jalaqy kóterseń, tiisti talaptardy alyp tastasań, barlyǵyna unaidy. Biraq memlekettik qyzmetshi bolǵannan keiin unamaityn, biraq elge qajet, múmkin bes jyldan keiin, múmkin on jyldan keiin túsinikti bolatyn sheshimderdi qabyldai bilýimiz kerek dep oilaimyn. Sol sheshimniń biri qabyldanǵan bolatyn. Endi ol basym kópshilikke unamaityny túsinikti. Ol solai bolýy kerek te. Bul sheshimdi qabyldar kezde halyq arasynda, oqýshylar arasynda jaqsy qabyldanbaitynyn biz bildik", - deidi Aimaǵambetov Májilis kýlýarynda jýrnalister suraǵyna jaýap berip.
Eks-ministrdiń aitýynsha, oqý jylyn bir aptaǵa uzartý týraly sheshim bilim sapasyn kóterý maqsatynda qabyldanǵan.
"Dál sol ýaqytta bul sheshim qajet boldy. Qazir tiisti ministrlik bul máselemen ainalysyp, tiisti sheshim qabyldaidy dep oilaimyn", - dedi depýtat.
Aimaǵambetov balalary mektepke áli baryp júrgenin, kitaptaryn tapsyrmaǵanyn aitty.
Aita keteiik, byltyr mektepterde sońǵy qońyraý kúnin aýystyrý týraly sheshim qabyldanǵan bolatyn. Iaǵni oqýshylar burynǵydai demalysqa 25 mamyrda shyqpaidy, sońǵy qońyraý 1 maýsymda soǵylady. Alaida qazir bul jańashyldyq ata-analardyń narazylyǵyn týdyryp jatyr. Olardyń aitýynsha, balalar kitaptaryn baiaǵyda tapsyryp qoiǵan, mektepke bosqa baryp júr.
