QR Bilim jáne ǵylym ministri Ashat Aimaǵambetov «Pedagogtar mártebesi týraly» zań qashan qabyldanatynyn aitty, dep habarlaidy QazAqparat.
«Qazir eń bastysy – zań jobasyn qabyldaý. Qazir biz tek zań jobasy týraly sóz qozǵap otyrmyz. Iaǵni, ol – áli zań emes. Memleket basshysynyń tapsyrmasyna sáikes, atalǵan zań jobasy men zańdy jyldyń sońyna deiin qabyldaýymyz kerek», - dedi ministr Úkimet otyrysynan keiin tilshilerdiń suraǵyna jaýap bere otyryp.
Sonymen qatar, Ashat Aimaǵambetov muǵalimderdiń ailyǵy men qosymsha aqysyn kóterý qai merzimge josparlanyp otyrǵanyn atap ótti.
«Bizdiń esepteýimizshe, depýtattar bizdi qoldap, jyldyń sońyna deiin zań jobasy qabyldanǵan jaǵdaida bizde BǴM buiryǵy men Úkimet qaýlysyna sai keletin normativtik-quqyqtyq qujattardy qabyldaýǵa jetkilikti ýaqyt bolar edi. Kelesi oqý jylynan bastap biliktilik, dápterdi tekserý, synyp jetekshiligi men magistr dárejesi úshin qosymsha aqy berile bastaýy kerek. Kelesi oqý jylyna deiin tolyq daiyn bolamyz dep otyrmyz. Osynaý josparlardyń bári de biýdjet qarajatymen bekitilgen. Respýblikalyq biýdjettik komissiianyń otyrysy ótti. Memleket basshysy tapsyrma bergennen keiin tiisti aqsha qarastyrylyp, bastamalardyń bári de qarajat turǵysynan qoldaý taýyp otyr», - dedi Ashat Aimaǵambetov.
Eske sala ketsek, búgingi Úkimet otyrysynda Ashat Aimaǵambetov muǵalimderdi ózine tán emes qyzmetke tartqandarǵa 120 AEK-ke deiin aiyppul salynatynyn habarlaǵan bolatyn.
