QR Bilim jáne ǵylym ministrligi joǵary bilim aqysyn qymbattatpaý úshin daǵdarysqa qarsy sharalar paketin usyndy, dep habarlaidy "Ult aqparat".
«Qazirgi ýaqytta BǴM men joǵary oqý oryndarynyń mindeti – bilim berý sapasynyń joǵary deńgeiin qamtamasyz etip qana qoimai, bilim alýshylarǵa qarjylyq júktemeni azaitý bolyp otyr. Men qazirdiń ózinde joǵary oqý oryndaryna oqý qunyn kótermeý týraly usynys jasadym, biraq bul úshin joǵary oqý oryndaryna da jaǵdai jasaý kerek. Osyǵan bailanysty daǵdarysqa qarsy sharalar paketin usynamyz», - dep jazdy ministr Ashat Aimaǵambetov facebook jelisinde.
Eń aldymen, JOO-nyń aqyly negizde bir bilim alýshyǵa eń tómengi shyǵyndarynyń jáne grant qunynyń araqatynasy boiynsha talapty joiý usynyldy. Memlekettik grant mólsherin arttyrý jaǵdaiynda bul talap joǵary oqý oryndarynyń baǵa saiasatyn aqtaýǵa ainalmaýy kerek.
Oǵan qosa, daiarlaýdyń praktikaǵa baǵyttalǵan salalary úshin ǵylymi dárejeniń mindetti bolýy men shtatta jumys isteý talaptary joiylady.
«Oqytýshylar sanynyń stýdentter sanyna qatynasy týraly talapty joiý kerek. Bilim berýdi damytýdyń jańa jaǵdailarynda bul talap ózekti bolmaidy. Tórtinshiden, qorytyndy baqylaý júrgizý formasy boiynsha talap kúshin joiylady. Qarjy, Býhgalterlik esep, IT, Meiramhana isi siiaqty salalarda oqý nátijelerine qol jetkizý tezispen emes, naqty praktikalyq jumys daǵdylary, demonstratsiialyq emtihandar nemese jobalar arqyly rastalady. Bul keibir ýniversitetterdegi qur belgi úshin jazylǵan kýrstyq jumystarǵa da qatysty», - deidi A. Aimaǵambetov.
Sondai-aq, pandemiia kezeńinde oqý bitirgen soń, bir jylda jumysqa ornalasý týraly talap taldaý kezinde ǵana eskeriletin bolady.
«Odan bólek, endi biz túlekterdi jumysqa ornalastyrýdy ǵana emes, osy túlekterdiń jańa jumys oryndaryn ashýyn da eskeretin bolamyz. Altynshy usynys, JOO ielenýi tiis materialdyq aktivterdiń túrleri boiynsha talaptardy qaita qaraý kerek. Eń bastysy – aktiv túrleri emes, bilim berý sapasyn qamtamasyz etý úshin jaǵdai jasalýy kerek», - dedi A. Aimaǵambetov.
Buǵan deiin Bilim ministri qashyqtan nemese aralas oqý túrin tańdaý múmkindigin engizýdi, ilim berýge biznes pen óndiris ókilderin, sheteldik oqytýshylardy tartýdy usynǵan edi.
