Ashat Aimaǵambetov Oqý-aǵartý ministri bolyp taǵaiyndaldy, - dep habarlaidy "Ult aqparat" Aqordanyń baspasóz qyzmetine silteme jasap.
"Ashat Qanatuly Aimaǵambetov Qazaqstan Respýblikasynyń Oqý-aǵartý ministri bolyp taǵaiyndalsyn, ol Qazaqstan Respýblikasynyń Bilim jáne ǵylym ministri laýazymynan bosatylsyn", - delingen Prezident Jarlyǵynda.
Ashat Qanatuly 1982 jyly Qaraǵandy oblysynda dúniege kelgen. 2003 jyly E. Bóketov atyndaǵy QarMÝ tarih fakýltetin «tarihshy, tarih muǵalimi» biliktiligi boiynsha támamdaǵan.
2006 jyly Qaraǵandy «Bolashaq» aktýaldy bilim berý institýtynyń zań fakýltetin «quqyqtaný» mamandyǵy boiynsha aiaqtaǵan.
Eńbek jolyn 2002 jyly E. Bóketov atyndaǵy QarMÝ-den bastaǵan, 2004–2005 jyldary «Ańsar» jastar ligasy» QB tóraǵasy bolǵan, 2005–2006 jyldary «MEDIA SP» JShS direktory, 2006–2012 jyldary — QarMÝ saiasattaný jáne áleýmettaný kafedrasynyń oqytýshysy, aǵa oqytýshysy, dotsenti retinde qyzmet atqarǵan.
2012–2014 jyldary Nura aýdany ákiminiń áleýmettik máseleler jónindegi orynbasary qyzmetin atqarǵan.
2014 jylǵy aqpan aiynan bastap 2017 jylǵy tamyzǵa deiin — Qaraǵandy oblysy Bilim berý basqarmasynyń basshysy laýazymyn atqarǵan.
2017 jylǵy tamyzdan bastap 2019 jylǵy qańtarǵa deiin QR bilim jəne ǵylym vitse-ministri qyzmetin atqarǵan.
2019 jylǵy qańtardan maýsymǵa deiin Qaraǵandy oblysy ákiminiń orynbasary bolyp qyzmet etti.
2003–2012 jyldar aralyǵynda Qaraǵandy qalalyq máslihatynyń III jáne IV shaqyrylymdarynyń depýtaty, qala máslihatynyń áleýmettik máseleler boiynsha turaqty komissiiasynyń tóraǵasy bolyp sailanǵan.
2019 jylǵy 13 maýsymynan Qazaqstan Respýblikasy Bilim jáne ǵylym ministri qyzmetin atqardy.
