Bilim jáne ǵylym ministri Ashat Aimaǵanbetov pedagogterdiń shamadan tys esep berý máselesin túbegeili sheshetin buiryqtyń mańyzdylyǵy týraly aitty, dep habarlaidy "Ult aqparat".
«Men 2020 jylǵy 6 sáýirde qol qoiǵan № 130 buiryqta orta, tehnikalyq jáne kásiptik bilim berý uiymdarynyń muǵalimderi toltyrýǵa mindetti qujattardyń naqty tizimi kórsetilgen. Bul qujattyń mańyzdylyǵy nede?
Budan bylai muǵalimderdi shamadan tys esep berýden aryltatyn zań júzindegi negiz paida boldy. Endi Ministrlik bekitken naqty tizim bar. «Pedagog mártebesi týraly» Zańǵa jáne Ákimshilik kodekske sáikes, muǵalimderden bekitilgen tizimnen ózge qujattar boiynsha artyq esepti talap etkenderdi arnaiy organ aiyppul túrindegi ákimshilik jaýapqa tartýǵa bolady», - dep jazdy ministr óziniń áleýmettik jelidegi paraqshasynda.
Sondai-aq, ministr atalǵan qujatty egjei-tegjeili túsindirdi
«Endi pán muǵalimi kúndelikti eki qujatty toltyrady. Birinshisi – synyp jýrnaly, ekinshisi – sabaq jospary.
Sondai-aq oqý jylynyń basynda kúntizbelik-taqyryptyq jospardy daiyndaidy jáne ár toqsan sońynda kriterialdyq baǵalaý boiynsha qujattardy toltyrady. Qalǵan qujattyń esh qajeti joq.
Eger muǵalim jas pedagogtiń tálimgeri bolyp, sol úshin 17 myń teńgege jýyq ústemeaqy alatyn bolsa, onda jas áriptesimen birlesip atqarǵan jumysy boiynsha ádistemelik qujat toltyrady. Eger muǵalim synyp jetekshisi bolsa, onda oqý jylynyń basynda tárbie jumysynyń josparyn jasaidy, ótkizilgen ata-analar jinalysy boiynsha elektrondyq formatta hattama toltyrady, oqýshylardyń tabelderin toltyrady jáne qajettiligine qarai olardyń jeke isterin jańartyp otyrady.
Mektep basshysy men basshynyń orynbasarlary toltyratyn mańyzdy qujattardyń da naqty tizimi belgilendi, artyq qujattyń esh qajeti joq.
Kolledj pedagogteri toltyratyn qujattar tizimi de bekitildi. Olar jyldyń basynda jumys isteýge arnalǵan oqý baǵdarlamasyn quryp, kúntizbelik-taqyryptyq jospar jasaidy, al kún saiyn sabaq josparyn ázirleidi, teoriialyq, óndiristik oqytý jáne jeke sabaqtardy esepke alý jýrnaldaryn toltyrady. Eger pedagog kýratordyń qyzmetin atqarsa, taǵy bir qujat qosylady. Shamadan tys esep berý kórsetkishin túbegeili azaitýǵa qatysty naqty jumystar mektepke deiingi jáne joǵary bilim berý deńgeileri boiynsha da júrgizilip jatyr. Joǵary oqý oryndarynyń oqytýshylary da qajetsiz qaǵaz júktemesinen arylady. Qazirgi ýaqytta BǴM tarapynan normativtik qujattarda kórsetilgen baqylaýdyń júrgizilýine qatysty toltyrylatyn qujattar tizimi qaita qaralyp jatyr. Basym bóligin alyp tastaý týraly sheshim qabyldandy. Máselen, kafedranyń jumys jospary, komissiianyń hattamasy, qyzmettik oqý jospary syndy qujattar bizge qajet emes. Bul rette muǵalimderge artylǵan artyq júktemeni azaitý boiynsha jaǵdai jasap qana qoimai, pedagogterden joǵary kásibi biliktilikti jáne sapaly bilim berýdi talap etetin bolamyz. Qoǵamda bilim berý sapasynyń nege aqsap turǵanyn túsindirý úshin, pedagogterdiń shamadan tys esep beretini, olardyń ózine tán emes jumystarǵa tartylýy, oqý baǵdarlamalary men oqýlyqtardaǵy olqylyqtar týraly jáne taǵy sol siiaqty máseleler aitylady.
Biraq bul problemanyń barlyǵy sheshilip jatyr jáne budan bylai da sheshimin taba beredi. Degenmen, bilim sapasy, eń aldymen, muǵalimderdiń biliktiligine tikelei bailanysty. Sol sebepti, pedagog únemi ózin-ózi jetildirip, kásibi deńgeiin arttyryp otyrýy kerek», - dedi ministr.
