Bilim jáne ǵylym ministri Ashat Aimaǵambetov mektepterge internet qyzmetin qosatyn provaiderlerdiń qyzmetin synǵa aldy, dep habarlaidy QazAqparat.
«Birinshiden aýqymdy jumys (bilim salasyn tsifrlandyrýǵa qatysty) atqarylyp jatyr. Ony joqqa shyǵarýǵa bolmaidy. Biraz aýyz toltyryp aitatyn ózgeris bar. Biraq bizge búgingi kúni ol jetkiliksiz. Bizdiń basty mindetimiz – bilim salasyndaǵy tsifrlandyrý saiasatyn belgileý, anyqtaý. Sol boiynsha tiisti normativtik-quqyqtyq aktilerdi qabyldaý. Bul bir. Ekinshiden tiisti talaptar qoiý. Úshinshiden barlyq deńgei boiynsha tiisti jumysty uiymdastyrý. Osy rette birinshi másele boiynsha normativti quqyqtyq qujattar arqyly talaptar bekitý boiynsha jumys jetkiliksiz», - dedi Ashat Aimaǵambetov Bilim jáne ǵylym ministrliginiń apparattyq otyrysynda.
Ministrdiń aitýynsha, mektepterge internet qyzmetin qosatyn provaiderdiń tarifi óte qymbat.
«Ekinshiden, biz satyp alyp jatqan sol qyzmettiń sapasy tómen. 10 Mbit degenimen, baryp ólshesek ol ólshemge jetpeidi. Ony ár mekteptiń basshysy qadaǵalap, tiisti jumysty júrgizip, kerek bolsa shaǵymdanyp, sotqa berýi kerek. Biraq ol jumys, ókinishke qarai, joq. Qomaqty qarajat bólinip jatqanymen, nátijesi shamaly. Bizde birneshe provaider – Qazaqtelekom, Bilain, taǵy basqalary bar. Biz bir ǵana provaidermen jumys júrgizbei, qaisysy sapaly qyzmet kórsetedi – sonyń qyzmetin paidalanýymyz kerek», - dedi ol.
Ashat Aimaǵambetov máselen 100 Mgittik internet qyzmetin jeke tulǵalar - bir baǵamen, mektep - basqa baǵamen alatynyn aitady.
«Mysaly Microsoft kompaniiasy mektepterge kem degende 70 paiyz tómendetilgen tarifpen qyzmet kórsetedi. Al basqa mekemelerge kommertsiialyq tarifterdi usynady. Bizdiń memlekette de osyndai saiasat bolýy kerek. Meniń oiymsha, internetke eń úlken tapsyrys berýshi – bilim salasy. Sondyqtan provaiderlermen jumys júrgizý kerek», - dedi ministr.
