Bilim jáne ǵylym ministri Ashat Aimaǵambetov bilim berýdiń mekteptegi qalypty formatyn qaitarýdy suraǵan ata-analardyń petitsiiasyna jaýap berdi, dep habarlaidy QazAqparat.
«Dástúrli ishtei oqityn mektep qaitarylsyn» degen petitsiiany oqydym. Qazaqstanda keleshektegi oqytý formatyna alańdap otyrǵan ata-analardyń bárine aitatynym, qashyqtan oqytý – álemdik Covid-19 pandemiiasyna bailanysty bárimizdiń qaýipsizdigimiz úshin qoldanylǵan májbúrli shara. Bizdiń aldymyzda naqty mindet turdy - oqýshylar men bilim qyzmetkerleriniń densaýlyǵyn saqtaý, sonymen birge oqytý protsesin úzbeý. IýNESKO málimetine sáikes, búkil álemde 1,5 mlrd oqýshy qashyqtan oqytýǵa múmkindik beretin tehnologiialarmen bilim alýda. Biz oqý úrdisin jalǵastyrý úshin qoldaǵy bar múmkindikti paidalandyq. Keibir jaǵdaidyń kezdeskeni bolmasa jalpy úrdis uiymdastyryldy dep esepteimin», - dep jazdy Ashat Aimaǵambetov Facebook -tegi paraqshasynda.
Ministrdiń aitýynsha, áitse de qazirgi tańda bilim berýdiń eń tiimdi quraly – dástúrli túrde mektepte bilim alý ekeni anyq.
«Eshkim de dástúrdi ishtei bilim berý formasyn alyp tastaǵan joq. Qashyqtan oqytý – májbúrli shara boldy. Álbette alda da mundai jaǵdailarmen betpe-bet kelgen kezde baiqaý kerek. Sol sebepti Memleket basshysynyń tapsyrmasymen biz tiisti jumystardy uiymdastyrýdamyz. Qashyqtan oqytýdyń tehnologiialaryn damytyp, mektepterdi aqparattandyrý jumysyn júrgizý kerek. Máselen aýa raiynyń buzylýyna bailanysty oqýshylardyń oqýdan qalýǵa májbúr bolatyn jaǵdaiyn alyp qarastyraiyq nemese keide bala úiinde oqýǵa májbúr bolady. Ishtei oqytý formaty búgingi tańda eń tiimdi sheshim ekenin bárimiz túsinip otyrmyz. Kelesi oqý jyly mektep qabyrǵasynan bastalar degen úmittemiz», - deidi ol.
