QR Oqý-aǵartý ministri Ashat Aimaǵambetov mektepterdi kúzetý úshin arnaiy oqý-jattyǵý ótkizýdi usyndy. Onyń paiymynsha, mektepterdegi mamandandyrylǵan kúzet qyzmetkerleriniń jumysy kóńil kónshitpeidi, dep habarlaidy QazAqparat.
Eń aldymen ministr qyzmetkerlerdiń jii aýysatynyn, tipti kún saiyn aýysatynyn atap ótti, bul mektepterdegi balalardyń qaýipsizdigin qamtamasyz etýge teris áser etedi.
Oǵan qosa, kúzetshiler balalardyń minez-qulqy men mektep tártibin bilýi kerek.
«Biz mektepterde mamandandyrylǵan kúzet agenttikteri bolýy kerek degen sheshim qabyldaǵanda negizinen tiisti qarsylyq kórsete almaityn nemese qaýipsizdiktiń tiisti deńgeiin qamtamasyz ete almaityn vahterlardyń ornyna osy talaptarǵa sai keletin mamandar kelgenin qaladyq. Biraq qazir keibir faktiler mamandandyrylǵan kúzet agenttikteri arqyly kelgen qyzmetkerlerdiń bizben buryn jumys istegen áriptesterinen esh aiyrmashylyǵy joq ekenin kórsetti. Biz úshin birinshi kezektegi másele – qaýipsizdikti qamtamasyz etý. Sondyqtan, bilim basqarmasy sharttar jasasqanda talaptar men konkýrstyq qujattamada osy jaittardy eskerip, qaýipsizdik kompaniialarynan barlyq qajetti daǵdylar men quzyretterdi talap etýi kerek. Osynyń bárin baiqaý ótkizý kezinde talapqa sai keltirý kerek», - dedi ministr apparattyq jinalysta.
Ministr mektepterdiń kez kelgen oqys jaǵdailarǵa daiyn bolýy kerektigin, olarǵa áreket etý algoritmin Ishki ister ministrligimen, Tótenshe jaǵdailar ministrligimen jáne basqa da múddeli organdarmen birge jańartý qajettigin aitty.
«Eger mundai múmkindik bolsa, olarmen tiisti jattyǵý ótkizý kerek. Balalarymyzdyń qaýipsizdigin qamtamasyz etý úshin jan-jaqty shara qabyldaý qajet», - dedi Oqý-aǵartý ministri.
