Osy jyldan bastap kolledj oqytýshylary biliktiligin kóterip, biliktilik sanaty berilgennen keiin laýazymdyq jalaqysynyń 30-dan 50 paiyzyna deiin qosymsha aqy alatyn bolady.
Bul týraly QR Bilim jáne ǵylym ministri Ashat Aimaǵambetov tehnikalyq jáne kásiptik bilim berýdiń 80 jyldyǵyna arnalǵan is-shara barysynda málimdedi, dep habarlaidy "Ult aqparat".
Vedomstvo basshysynyń aitýynsha, buǵan deiin biliktilik sanattary úshin qosymsha tólemderdi tek mektep muǵalimderi alǵan bolatyn. «Pedagog mártebesi týraly» Zańnyń qabyldanýymen kolledj pedagogteri de biliktilik sanaty berilgennen keiin ai saiyn qosymsha aqy alatyn bolady.
«Memleket basshysynyń qoldaýymen 2020 jyldyń qańtar aiynan bastap kolledj pedagogteriniń jalaqysy artty, aldaǵy jyldary da arta túspek. Biliktilik sanaty úshin pedagogterge qosymsha aqy tóleý máselesi kóp jyldar boiy kóterilgen bolatyn. Eger mektepterde muǵalimder biliktilik sanattary úshin qosymsha aqy alsa, kolledjderde mundai úrdis bolǵan joq. Endi kolledj pedagogteri de ai saiyn laýazymdyq jalaqysynyń 30-dan 50 paiyzyna deiin qosymsha aqy alatyn bolady. Óz kezeginde kolledj direktorlary men direktor orynbasarlarynyń atqarǵan jumysynyń tiimdiligine bailanysty óz jalaqysynyń 100 paiyzyna deiin qosymsha aqy alý múmkindigi bar. Bul áriptesterimizdiń jumysqa degen ynta-jigeri men jumystyń tiimdiligin arttyra túspek», – dep atap ótti ministr.
Kolledjderdi suranysqa ie 100 mamandyq boiynsha jańǵyrtý jáne bilikti mamandar daiarlaýdyń halyqaralyq tájiribesin engizý maqsatynda «Jas maman» respýblikalyq jobasy iske asyrylyp jatqany belgili.
Ministrdiń aitýynsha, atalǵan baǵdarlama sheńberinde qazaqstandyq kolledjderge tehnikalyq qural-jabdyqtar satyp alyp qana qoimai, bilim berý baǵdarlamalaryn da jańartý josparlanǵan.
«Jas maman» – Elbasynyń bastamasymen júzege asyrylyp jatqan teńdessiz baǵdarlama ekenin aita ketken jón. Ol elimizdiń 180 kolledjinde júzege asyryla bastady. Osy rette tek tehnikalyq qural-jabdyq satyp alý ǵana emes, sonymen qatar bilim berý baǵdarlamalaryn jańartý da josparlanǵan», – dedi vedomstvo basshysy.
Ministr óz sózinde QR Parlamenti Májilisi depýtattary tobynyń bastamasymen TjKBB júiesin damytý úshin normalar engizilgen Zań jobasy qaralyp jatqanyna toqtalyp ótti.
Atap aitsaq, mamandardy daiarlaý barysynda eńbek naryǵy men jumys berýshilerdiń suranystaryn eskerý úshin kolledjderge akademiialyq erkindik beriledi.
«Aqsha stýdentpen birge júredi» printsipi boiynsha qabyldaý tetigin engizý kolledjdiń básekege qabilettiligin jáne kolledjder arasyndaǵy básekelestikti arttyrýǵa múmkindik beredi. Eger qazir óńirlik bilim basqarmalary konkýrs ótkizip, memlekettik bilim berý tapsyrysy boiynsha kolledjderge qansha oryn beriletinin anyqtasa, bolashaqta bul sheshimdi stýdentterdiń ózderi qabyldaityn bolady. Stýdentter qai kolledjdiń básekege qabiletti jáne jaqsy bilim beretinin ózderi tańdaidy», – dedi Bilim jáne ǵylym ministri.
Óz kezeginde «Qazaqmys» korporatsiiasy» JShS basqarma tóraǵasynyń orynbasary Ádilet Barmenqulov kolledj pedagogterine jan-jaqty qoldaý kórsetiletinin atap ótti. Osylaisha, «Úzdik pedagog» respýblikalyq konkýrsyna qatysqan pedagogterdiń árqaisysy korporatsiia tarapynan 200 myń teńge kóleminde syiaqy beriledi.
Sondai-aq Qaraǵandy oblystyq máslihatynyń depýtaty, metsenat Bekzat Altynbekov óz sózinde «QR kolledjderiniń TOP 100 stýdenti» baiqaýynyń jeńimpazdaryn 100 myń teńgege deiingi aqshalai syilyqtarmen jáne «WorldSkills» álem chempionatynyń jeńimpazyn bir million teńge kólemindegi syiaqymen marapattaýǵa daiyn ekenin jetkizdi. Elimizdegi kolledjderdiń úzdik pedagogterine qazaqstandyq salalyq bilim jáne ǵylym qyzmetkerleri kásipodaǵymen saýyqtyrýǵa arnalǵan 17 joldama berilgenin de aita ketken jón.
