Qazaqstan balalar quqyqtaryn qorǵaýdyń halyqaralyq júiesin damytýǵa belsendi qatysady. QR Bilim jáne ǵylym ministri Ashat Aimaǵambetov balalardy tól merekesimen quttyqtady, dep habarlaidy "Ult aqparat".
«Qazaqstandyq búldirshinderdi tól merekesi – Balalardy qorǵaý kúnimen shyn júrekten quttyqtaimyn! Balalardy qorǵaý kúni – jas urpaqtyń qaýipsizdigi, densaýlyǵy, quqyqtary men bostandyqtaryna qatysty jaýapkershilik týraly taǵy bir márte eske salatyn ataýly kún. Qazaqstan balalar quqyqtaryn qorǵaýdyń halyqaralyq júiesin damytýǵa belsendi qatysady. El Prezidenti balalardyń quqyqtaryn qorǵaý jáne olar úshin qolaily jaǵdai jasaý úshin qabyldanyp jatqan sharalardy kúsheitý mindetin júktep otyr. Álbette, bul jumystardyń barlyǵy memlekettik, sondai-aq úkimettik emes uiymdarmen kúndelikti negizde júrgizilýi tiis», - dep jazdy ministr Facebook jelisinde.
Bilim ministri búgingi Úkimet otyrysynda balalardyń quqyqtaryn qorǵaý jáne olardyń qaýipsizdigin qamtamasyz etý máselesi qaralǵanyn atap ótti.
«Inkliýzivti bilim berýdi damytý, balalardy sektsiialar jáne úiirmelermen qamtý deńgeiin arttyrý, balalar úileriniń sanyn azaitý, ystyq tamaqpen jáne qajetti jaǵdailarmen qamtamasyz etý, balalar úshin qaýipsiz orta qurý siiaqty keń aýqymdy máseleler kóterildi. Bizdiń jumysymyzdyń basty baǵyty – qazaqstandyq balalardyń qaýipsizdigin saqtai otyryp, olarǵa sapaly bilim berý.
Qymbatty balalar! Merekelerińizben! Sizderge zor densaýlyq, amandyq tileimin! Jazǵy demalysta kitapty kóbirek oqyńyzdar! Demalystaryńyz jaqsy ótsin!», - dep quttyqtady A. Aimaǵambetov.
