«Bolashaq» baǵdarlamasy damý protsesterin tys qalmaýy tiis. Bul týraly Ortalyq kommýnikatsiialar qyzmetindegi baspasóz máslihatynda QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Bolashaq» baǵdarlamasy óte jaqsy nátije berýde, óziniń tiimdiligin kórsetti. Qazaqstandyqtardyń kóbi osy baǵdarlama boiynsha bilim aldy, bul óz kezeginde «áleýmettik lift» boldy. Árine, ýaqyt ótken saiyn baǵdarlamany jetildirip otyrý qajet. Bizge naqty tapsyrma berildi. Atap aitqanda, bul baǵdarlama da evoliýtsiiaǵa ushyraityny anyq. Júktelgen mindettiń aiasynda qajetti qujatty daiarlaimyz», - dedi ministr.
Baspasóz máslihatynan keiin tilshiler ministrden "Bolashaq" baǵdarlamasyna engiziletin ózgerister jaiynda keńirek aityp berýdi surady. Onyń sózine qaraǵanda, memlekettik qyzmetkerlerdiń naqty sanaty boiynsha shekteý bolady.
"Ony ózderińiz estidińizder, qandai tapsyrma ekenin de bilesizder. Bul - memlekettik qyzmettegi azamattarǵa baǵdarlamaǵa qatysýǵa shekteý qoiý máselesi. Osy másele boiynsha tiisti qujattar daiyndalady. Sol kezde habaryn aitamyz", - dedi Aimaǵambetov.
Esterińizge sala keteiik, 15 shildede ótken Úkimettiń keńeitilgen otyrysynda QR Prezidenti Qasym-Jomart Toqaev «Bolashaq» baǵdarlamasyna qatysý talaptaryn ózgertýdi tapsyrdy.
Prezident bilim jáne ǵylym, ulttyq ekonomika ministrlikterin mysalǵa keltirdi. Ministrdiń orynbasary "Bolashaq" baǵdarlamasy boiynsha oqý úshin qyzmetten op-ońai kete salatynyn aitty. 45 jastan keiin de oqýǵa túskender bolǵan.
Toqaev mundai jaǵdai memlekettik qyzmet emes, absýrd ekenin atap ótti. Sondai-aq, ol saiasi qyzmetshiler oqýmen jumystan bos ýaqytta ainalysýy kerek ekenin qadap aitty. Bastysy, bul iske memleket qarjysy jumsalmaýy kerek degen pikir bildirdi.
