Bilim jáne ǵylym ministri Ashat Aimaǵambetov bilim jáne ǵylym salalaryn tsifrlandyrý jumysy qalai atqarylyp jatqany týraly málimettermen bólisti, dep habarlaidy QazAqparat.
«Ótkende memleket muǵalimderdiń jalaqysyn ósirgende jumysta otyryp alyp, «órt sóndirýshi» bolyp kettik. Qai jerde aqsha tólendi, qai jerde tólenbedi – bárin baqylap otyrýǵa týra keldi. Sebebi bilim júiesiniń sipaty óte ortalyqtandyrylǵan. Ár aýdan nemese oblysta ailyq tóleý, shákirtaqy nemese syiaqy berý jumystary másele týyndatady. Sol sebepti qysqa ýaqyttyń ishinde qarjylandyrý salasynda tsifrlandyrý jumystaryn júrgizý kerek», - dedi Ashat Aimaǵametov qashyqtan oqytý tehnologiialaryn qoldanýdyń problemalary talqylanǵan onlain rejimdegi kezdesýde.
Ministrdiń aitýynsha, Ǵylymi jumystardy tirkeýdiń qazaqstandyq indeksinde ǵalymdardyń bazasy, ótinimderdiń tizimi, eseptilik te engizilmek.
«Máselen belgili bir ǵalym osynsha qarajat aldy desek, ol aqshany qalai paidalanǵanyn, eseptilik qalai bolǵanyn tekserip otyrýǵa bolady. Kolledjderde de orta bilimdegidei problemalar qordalanyp tur. Atap aitqanda bilim berý kontentteri turǵysynda qiyndyqtar bar. Platformalar bar desek te, kontent, elektrondy jattyǵý alańy, elektrondy oqýlyq ta joq», - dedi ol.
Ashat Aimaǵambetov ministrliktiń qazirgi tańda mektepter boiynsha elektrondy oqýlyqtarǵa basa mańyz berilip jatqanyn jetkizdi.
«Kóp adam bylaiǵy kitapty elektrondy formatqa aýystyrdy – bitti, másele sheshildi dep oilaityn bolý kerek. Kei jerde solai aýdarylyp ta jatyr. Biraq qashyqtan oqytýdyń talabyna sai keletin laiyqty elektrondy oqýlyqty daiyndap jatqan baspalar bar. Qazir atyn ataǵym kelmeidi. Baspalardyń aldyna elektrondy oqýlyqtarymyz bolýy kerek degen talap qoidyq. Balalarǵa ol qoljetimdi bolýy tiis», - dedi ol.
