Sońǵy qońyraý is-sharasyn 9 jáne 11- synyp bitirýshilerine ashyq aýada ótkizýge ruqsat berilip otyr. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat tilshisi.
«Sońǵy qońyraý is-sharasyn 9 jáne 11-synyp bitirýshilerine sanitarlyq talaptardy qatań saqtai otyryp, ashyq aýada ótkizýge ruqsat berilip otyr. Bul oqýshylar úshinshi toqsannan bastap negizinen dástúrli formatta ári onlain formatta oqydy. Sondyqtan bul eki sheshim bir-birimen úilesip otyr. Attestat berý rásimin de osyndai formatta ótkizýdi josparlap otyrmyz. 9 jáne 11-synyp túlekteri úshin qabyldanǵan osyndai sheshimdi der kezinde ata-analaryna jetkizip, tiisti daiyndyq jumystaryn ótkizý kerek», - dedi ministr vedomstvonyń apparat jinalysynda.
Osy oraida Aimaǵambetov maska taǵý rejimin, áleýmettik ara qashyqtyqty, sondai-aq basqa da sanitarlyq talapty saqtaý boiynsha naqty jumysty júrgizýdi tapsyrdy. Osy talaptar saqtalǵanda jáne ashyq taza aýada ótkizgende ǵana tiisti ruqsat beriledi.
«Qorytyndy attestattaý týraly kóp talqylandy. Osy baǵytta naqty aqparat, ádistemelik usynystar jiberildi. Sondyqtan bul másele boiynsha daý-damai týǵyzbai, tiisti deńgeide uiymdastyrý kerek», - dedi ministr.
Bul turǵyda Ashat Aimaǵambetov attestattaýǵa qatysty atqarylatyn jumysty, qabyldanǵan sheshimdi ata-analarǵa, mektep bitirýshilerge durystap jetkizip, túsindirý kerektigin tapsyrdy.
Budan buryn habarlanǵandai, sońǵy qońyraý ádettegidei 25 mamyrda ótkiziledi. Biylǵy shekteý is-sharalary eskerilip, birneshe format usynylmaq. Birinshiden, dástúrli túrde ashyq taza aýada 9 jáne 11-synyp oqýshylary úshin, sondai-aq 300-ge deiin oqýshysy bar ári osy ýaqytqa deiin shtattyq rejimde oqytyp kele jatqan mektepter ótkizedi.
