Áigili Kann kinofestivaliniń sarapshylaryn tánti etip, jiýri tóraiymy Keit Blanshettiń aktrisa Samal Esliamovany úlken tebirenispen kelip, qushaǵyna qysýy "Aikanyń" salmaǵyn sol kezde sezdirgen. Biraq film álemdik prokatqa shyqqanǵa deiin biz ony osy álemdi moiyndatqan daqpyrtymen ǵana bildik, qurmettedik, aktrisanyń shynaiylyǵy men ishki erkindigine tánti boldyq. Al, búgin... Samal-Aikanyń árbir qimylyn ańdyp otyrmyz. Kórermenin aktrisaǵa qosaqtap qoiyp, Máskeýdiń qarly boranynda búrseń qaqtyratyn rejiserdiki ne qudiret?
"Talaibekova! Bala jylap jatyr.Tur emiz!" Osy sátten bastalatyn jantalas kórermendi kórkem filmnen julyp alyp, búgingi qatal qoǵamnyń naqty ózine laqtyrady. Quddy bir derekti kadrlar kóz aldyńnan ótip jatqan siiaqty. Munda siz kútetin aianysh, jubanysh joq. Biraq báribir bizge perzenthanadan qashyp shyǵyp, ólermen keýdesin súirep baryp, taýyq tazalaityn qyrǵyz qyzynyń basynan qazir bireý sipaityndai kórinedi.
Aq qardy ombylap júrip, kók muzdy jinap aparyp, isigen ishine basyp, tar tósegine jata qalǵanda da janyndaǵylar shai berip, jaýraǵan kóńilin jubatatyndai kórinedi.
"Jumys izdep júrsiń be? Bizge orys tilin jaqsy biletin adamdar kerek!" dep vizitkasyn usynǵan bikeshti kórgende júregiń jarylardai qýanyp "qazir kóligine salyp áketetin boldy" dei bergenińde ol "eki saǵattyń ishinde sonda keletin bol!" dep quiǵyta jóneledi.
Qar tazalai almai qalshyldap turǵan qyzǵa bastyq kelinshektiń "Aýyrsań úiińde jatý kerek?" deýi de munda zańdy.
Qaryzyn daýlaityn banditter de seniń "baiqus qyzǵa bireý mireý qazir kómekteser" deýmen kele jatqan qypylyq úmitińniń kúl parshasyn shyǵarady. Tipti ol Aikaǵa kúshikteri jabysa emip jatqan ene ittiń de emirený lázzatyn adam siiaqty buiyrtpaidy. Baiqasańyz, qansha azap, qandai taýqymetti bastan keship júrse de jylamaǵan, taǵdyryna shaǵynbaǵan Aikanyń kózinen osy jerde ǵana alǵash ret jas shyǵyp, óksi jylaidy. Qandai aýyr kadr edi...
Sergei Dvortsevoi sizdi aldamaidy. Óitkeni bul gastarbaiter bop júrgen jalǵyz qyrǵyz qyzynyń taǵdyry emes jáne Máskeý álemdegi jalǵyz tasbaýyr, qatty qala emes. Bul siz ben biz birge dáýir keship jatqan myńdar men milliondardyń taǵdyry. Rejisserda osy sebepti tosynnan keletin meiirim, oqystan paida bolatyn keńpeiil keiipker joq. Ol filmniń sońyn kórermenine qaldyrady. Balany alyp ketesiń be, joq, endi ǵana emirenip, analyq mahabbaty oianǵan Aikamen qaldyrasyń ba, ol da seniń óz erkiń. Taǵy qatal realizmge top etesiń.
"Úzdik áiel róliniń" Samalǵa "óz aiaǵymen" kelýi zańdy. Samal Aikany óziniń tabandylyǵynyń, ónerge degen adaldyǵynyń arqasynda alyp shyqty. Keiipker bolyp ómir súrýdiń eń úzdik, eń ozyq úlgisin Samal kórsetti. Úzilýge shaq turǵan úmitti aiaǵyna deiin osyndai jankeshtilikpen alyp shyǵý bizdiń glamýr aktrisalardyń qolynan qanshalyqty keletini men úshin kúmándi...
Biz buǵan deiin Dvortsevoidyń "Tiýlpanyn" qabyldai almadyq. "Qazaqty sorly qyp kórsetýdi qoiý kerek. Malshyǵa da tsivilizatsiia keldi, jyrtyq úide eshkim turmaidy" dedik. Ondaǵy qulaǵyn qaǵazben artqa jelimdep otyratyn sherli jigittiń janynan, kiiz úidiń jaqtaýynda tizesin qushaqtap alyp zarlana án aityp otyratyn kishkentaidyń qyzdyń armanynan ózimizdiń "namysymyzdy" artyq kórdik. Bálkim, Kann tórinen eń úzdik áiel róli buiyrmaǵanda Aikany da biraz jerge aparyp ákeler me edik, kim biledi...
Sholpan Raqymqyzy
