Prezident Qasym-Jomart Toqaev ekologiia máselesin júieli túrde sheshýdi tapsyrdy. Osy mindetterdi oryndaýǵa Ekologiialyq uiymdar qaýymdastyǵynyń tóraǵasy Aigúl Soloveva daiyn ekenin málim etti, dep habarlaidy QazAqparat.
«Meniń oiymsha, bul – durys ári ýaqtyly kóterilgen problema. Prezident eldegi ekologiialyq problemalardy sheshýdiń mańyzdylyǵyna basymdyq berip otyr. Birinshiden bul bizdiń dástúrmen bailanysty. Kóshpeli halyq qashan da tabiǵatpen bite qainasyp, úndesip ómir súrgen. Ekinshiden pandemiia kezeńinde pnevmoniianyń órship ketýine ult immýnitetiniń, adamdardyń tynys joldarynyń álsireýi ózindik áserin tigizdi. Sebebi biz ekologiiany ylǵi eń sońǵy kezekke ysyryp, qarap keldik. Ziiandy zattar ókpege túsip, ony jegidei jep, immýnitetti álsiretetinin eskere bermedik», - deidi Ekologiialyq uiymdar qaýymdastyǵynyń tóraǵasy.
Aigúl Soloveva Prezidenttiń jyl saiyn 5 mln tonnaǵa jýyq turmystyq qatty qaldyq jinalatynyn, olardyń 15 paiyzy ǵana óńdeletinin aitqanyn eske saldy.
«Jerimiz keń bolǵandyqtan qoqysty betaldy shasha beremiz desek, ońbai qateleskenimiz. Adamdardyń kózi ushyp júrgen paketterge, lastanǵan ainalaǵa úirenip qalady. Al qylmystyń bári bala kezde tereze shaǵýdan bastalatynyn umytpaiyq. Munda da sol. Ainaladaǵy qoqysty kórgen adam tazalyq mádenieti men tártipti, dástúrin umytady. Artynsha mundai qaldyqtar, synap shamdar men tamaq qaldyqtar shirip, qaýipti zattardy, onyń ishinde metandy bóle bastaidy. Osynyń bári ekologiiany odan ary kúrdelendire túsedi», - deidi ol.
Aigúl Soloveva elde turaqty túrde tal egý aktsiialary uiymdastyrylyp turǵanymen aǵashty esepsiz kesý de toqtamai turǵanyn jetkizdi.
«Sol sebepti ekologiialyq mádenietti balaǵa kishkentai kezinen sińirý kerek. Ózim aǵashty kesý – tiri aǵzany óltirýmen para-par dep esepteimin. Prezident ekologiia máselesin júieli túrde sheshýdi tapsyrdy. Men ol mindetterdiń bárin oryndalýy tiis tapsyrma retinde qabyldaimyn», - dedi ol.
Eske sala ketsek 10 shildede ótken Úkimettiń keńeitilgen otyrysynda Memleket basshysy Qasym-Jomart Toqaev itbalyqtardy taiaqpen, taspen uryp júrgen videony kórgenin aitqan bolatyn. Prezident osyǵan orai Bilim jáne ǵylym ministri Ashat Aimaǵambetovqa balalardy qorshaǵan ortany qorǵaýǵa tárbieleý isine basa mán berýdi tapsyrdy. Sondai-aq Prezident mektep baǵdarlamasyna «Balalardyń ekologiialyq bilimi» atty jańa pán engizýdi tapsyrdy.
