«Birlik pen kelisim – eldigimizdiń myzǵymas tuǵyry». Mundai pikirdi Qoldanbaly etnosaiasi zertteýler institýty direktorynyń orynbasary Aigúl Sádýaqasova bildirdi, dep habarlaidy QazAqparat.
«Birlik pen kelisim – eldigimizdiń myzǵymas tuǵyry. Kópetnosty Qazaqstan halqy úshin bul tuǵyr etnosaralyq, konfessiiaaralyq tatýlyqty saqtap qalý máselesi syndy óte mańyzdy ekeni sózsiz. Qazaqstandaǵy basty strategiialyq resýrs etnosaralyq kelisim men jalpyulttyq birlik dep bilemiz. 90-shy jyldardyń saiasi-ekonomikalyq jaǵdaiy demokratiiaǵa bet alǵan Qazaqstan úshin qaýyp-qaterlerge toly boldy. Eń basty qaýyp-qaterler – etnosaralyq qaqyǵystar men daý-janjaldar. 100-den astam etnos ókilderi meken etken el bir sátte toqyraýǵa ushyraýǵa ábden múmkin edi. Budan saqtap qalatyn tek bir jol boldy, ol – birik pen kelisim qaǵidattarynan bir qadam da aýytqymaý», - dedi ol Elbasy amanaty: eldiktiń jeti tuǵyry» saraptamalyq dóńgek ústel otyrysynda.
Onyń atap ótýinshe, osy jolda anyq saiasat júrgizý maqsatynda egemen eldiń Ata zań erejelerinde barlyq azamattardyń teń quqyqtary, erkindik pen jaýapkershilikteri bekitildi. Táýelsizdik alǵan sátten bastap qabyldanǵan normativtik-quqyqtyq aktiler, doktrinalar men baǵdarlamalar, sondai-aq olardy iske asyrý aiasyndaǵy is-sharalar qoǵamdaǵy etnosaralyq qatynastardy turaqtandyrýǵa múmkindik berdi. Etnikalyq suraqtarady saiasilandyrmaý úshin zańdy túrde etnikalyq negizde saiasi partiiany qurýǵa tiym salyndy. Bul qadam da kelisim men birlikke óz úlesin qosty.
«Bizdiń birligimiz áralýandyqta. Polietnostyq damý úshin resýrs retinde úlken áleýetke ie. Qazirgi álem múldem basqa, kóp mádenietti. Bul ártúrlilikte ár mádeniettiń, eldiń ózindik kelbeti men ereksheligi bar. Qazaqstan eldiń ekonomikalyq, saiasi, áleýmettik, mádeni jáne rýhani protsesterine belsendi qatysatyn kóptegen etnos ókilderi úshin Otan bolyp otyr. Búginde olarda óz tilin, mádenietin úirenýge kóptegen múmkindigi bar. Árine, ár ult ózin-ózi damytýǵa, ulttyq biregeilikti, tildi, mádenietti saqtaýǵa tyrysady. Ekinshi jaǵynan, qazirgi álemdegi ulttardyń ózin-ózi damytýy olardyń tyǵyz ózara árekettesýinsiz, yntymaqtastyqsyz, mádeni qundylyqtarmen almasýsyz jáne ózara tiimdi bailanyssyz múmkin emes ekenin túsinýimiz qajet. Integratsiia tendentsiiasy ǵylymi-tehnikalyq revoliýtsiianyń jetistikterimen adamzat aldynda turǵan jahandyq máselelerdi sheshý qajettiligine bailanysty kúsheie túsýde. Bul tendentsiialar bir-birimen áldeqaida bailanysty ekenin este ustaǵan jón», - dedi Aigúl Sádýaqasova.
