Joldaýdaǵy tapsyrmalar men mindetterdiń biri - adam kapitalyn damytý. Bul týraly Senat depýtaty Aigúl Qapbarova málim etti, dep habarlaidy QazAqparat.
«Prezident Qasym-Jomart Toqaevtyń Qazaqstan halqyna arnaǵan Joldaýynda adami kapitaldy damytý, jańa úlgidegi bilim salasyna investitsiiany tartýdy jańa ekonomikalyq baǵdardyń jeti qaǵidatynyń biri retinde atap ótti. Adami kapital ár adamnyń ómir boiy jinaqtaǵan bilimin, tájiribesin, tipti densaýlyq jaǵdaiyn qoǵamnyń paidasyna qyzmet etýge múmkindik týǵyzady. Bizdiń halqymyz adam densaýlyǵyn naqty kapitalǵa balap, qysqa túrde «Densaýlyq – zor bailyq» dep tujyrymdady. Deni saý adam – jeke adamnyń ǵana emes, búkil qoǵamnyń bailyǵy, memlekettiń bailyǵy ekeni daýsyz. Sondyqtan densaýlyǵyn kútip, shynyqqan, sóitip, qoǵamdy, eldi damytýǵa óz úlesin qosyp júrgen azamattyń orny bólek», - dedi senator.
Osy oraida ol budan buryn elimizde «Salamatty Qazaqstan» degen memlekettik baǵdarlama qabyldanǵanyn eske saldy. Ol da memleketimizdiń ár azamattyń densaýlyǵyn saqtaýyn, densaýlyq saqtaý salasyn damytýdy kózdeitin, jalpy alǵanda adami kapitaldy damytýdy qoldaityn qujat boldy.
«Densaýlyqty saqtaý, sapaly bilim berý, jumys oryndaryn qurý jáne kásibi daǵdylardy oqytý negizinde adamdarǵa investitsiia salý adami kapitaldy damytýǵa yqpal etedi. Bul kedeilikti joiýǵa jáne áleýmettik turǵydan birtutas qoǵam qurýǵa múmkindik beretin negizgi shart bolyp tabylady. Sondyqtan bul salalarǵa salynǵan investitsiialar bir-birin tolyqtyrady jáne kúsheitedi. Bul degenimiz, qoǵamymyz da, memleketimiz de qanattas damyp, órkenietke qarai ilgerilei berý degen sóz. Joldaýdaǵy tapsyrmalar men mindetterdiń máni de osy – adam kapitalyn damytý arqyly qoǵam men memleketti qatar damytyp, joǵary órkenietke umtylý. Bul túptep kelgende halyqtyń jaǵdaiyn, ál-aýqatyn jasqartýǵa yqpal etetini aqiqat», - dedi A. Qapbarova.
