Dirijer retinde qazirgi zamannyń áigili mýzykanty Zýbin Meta óner jáne QR Mádeniet jáne sport ministri Arystanbek Muhamediuly Túrkistan qalasynda boldy, dep habarlaidy "Ult aqparat".
Tanymal mýzykant, dirijer Zýbin Meta EKSPO-2017 kórmesine qatysyp, LaSkala teatry qazaqstandyq kórermenderdiń nazaryna Uly kompozitorlardyń máńgilik týyndylary - Djýzeppe Verdidiń «Falstaf» operasyn jáne L.Bethovenniń simfoniiasyn usynýy josparlanǵan. Osy maqsatta TMD elderi arasynda tuńǵysh ret Astana qalasyna taban tiregen Zýbin Meta Túrkistan qalasynda sáýlet óneriniń ozyq úlgisi, rýhani mura Q.A.Iasaýi kesenesin tamashalady.
Belgili óner iesin zor qoshemetpen qarsy alǵan túrkistandyqtar mártebeli meimandarǵa ulttyq dástúrmen órnektelgen jón-joralǵymen erekshe qurmet kórsetti. Túrkistan qalasynyń ákimi Á.Óserbaev ystyq yqylasyn jetkizip, Zýbin Metaǵa shapan jaýyp, qazaqtyń qyl qobyzyn tartý etti. Sonymen birge, qalalyq «Aqsaqaldar alqasynyń» tóraǵasy J.Áziretbergenuly mýzyka áleminiń kórnekti tulǵasyna barsha Túrkistan halqynyń sálemin joldap, mol shyǵarmashylyq tabys tiledi.
Osylaisha bastaý alǵan sapar Q.A.Iasaýi kesenesimen tanysýǵa ulasty. Sonaý zamandardan syr shertetin keseneniń bólmelerin aralap, ulttyń ulylyǵynan aqpar alǵan Zýbin Meta jýrnalisterge bergen suqbatynda qazaq halqynyń dúnietanymyna, rýhani muralarǵa degen qurmeti men qonaqjailyǵyna erekshe tańdanysyn jetkizdi. Sondai-aq, ol «Elbasylaryńyz N.Á.Nazarbaevtyń el basqarýdaǵy kemeńgerligi maǵan airyqsha baiqaldy. Az ýaqyt ishinde sáýlettik kelbeti áleminiń ózge qalalaryna uqsamaityn Astanadai qala turǵyzyp, jas memleketti órkenieti biik, áleýeti joǵary elge ainaldyrǵany aiqyn sezilip tur. Qazaqstanǵa onyń ishinde Astana qalasyna jasaǵan saparym maǵan erekshe áser berdi. Al, Túrkistan qalasy jáne onyń qonaq kelse qushaǵyn keń jaiatyn darhan peiildi turǵyndaryn men umytpaimyn. Bul memleket jáne onyń halqy jaily keń nasihat bolýy kerek dep esepteimin jáne men júrgen jerimde qazaq eli týraly aita júretin bolamyn», - dep Qazaqstanǵa jasaǵan saparyn joǵary baǵalady. Áigili mýzykantpen birge kelgen jubaiy Nensi Meta: «Men Qazaqstanǵa kelgenge deiin bul el týraly múlde basqasha kózqarasta edim. Mine, osy saparda N.Á.Nazarbaev basqaratyn Qazaqstan memleketiniń órkendep ósip kele jatqanyn jáne onyń halqynyń bolashaqqa degen seniminiń nyq ekendigine kóz jetkizdim», - dep pikir bildirdi.
Sapardy qorytyndylaǵan QR Mádeniet jáne sport ministri Arystanbek Muhamediuly óz sózinde: «Qazaqstanǵa sapar shegip otyrǵan álemge aty máshhúr Zýbin Metanyń kelýi úlken mártebe. Jáne de qurmetti qonaqtyń osynda kelip qana qoimai LaSkala teatry qazaqstandyq kórermenderdiń nazaryna Uly kompozitorlardyń máńgilik týyndylaryn usynýy elimizdiń
órkenietti elder qatarynda aitarlyqtai beleske jetkendigin baiqatady. Elbasymyzdyń ulttyq ónerge, mádenietimizge degen qamqorlyǵy qonaqtarymyzdy da bei-jai qaldyryp otyrǵan joq. Sebebi, ónerdiń biik shyńyn baǵyndyrǵan Zýbin Meta myrza elimiz jaiyndaǵy kóz qarasynda mádenietimiz ben az ýaqyt ishinde oǵan jasalǵan qoldaýlardyń mol bolǵandyǵyn paiymdap, ultymyzdyń ónerge degen qurmetiniń joǵary ekendigin jetkizdi. Al, Túrkistan qalasyna jasaǵan saparynda ol kisi osyndaǵy qundy muralarymyzǵa erekshe qyzyǵýshylyq tanytyp, halqymyzdyń dúnietanymynyń keń ekendigine taǵy bir kóz jetkizdi», - dep atap ótti.
