Qazaqstanda 18 millionnan astam turǵyn bolsa, onyń 14,5 milliony 14-29 jas aralyǵynda jas býyn. Bul týraly búgin elordada ótken aýyl jastarynyń II Respýblikalyq forýmynda jastar qanatynyń tóraǵasy Áigerim Kúkeeva aitty, dep habarlaidy QazAqparat.
Aýyl jastarynyń II Respýblikalyq forýmynda «Aýyl» halyqtyq - demokratiialyq patriottyq partiiasynyń bastamasymen «Aýyl» HDPP jastar qanatynyń erejelerine ózgertýler engizý maqsatynda jańa quramǵa daýys berildi. Forýmǵa qatysýshylar Atqarý komitetiniń jańa quramyn maquldap, jastar qanatynyń tóraǵasyn sailady. Bul qyzmetke S.Seifýllin atyndaǵy QazATÝ-dyń tárbie jumysy departamentiniń direktory Áigerim Kúkeeva biraýyzdan sailandy.
«Qazaqstanda 18 millionnan astam turǵyn bolsa, onyń 14,5 milliony 14-29 jas aralyǵyndaǵy jas býyn. Elimizdiń qai óńirinde bolsyn jastar bar. Olardyń kóp shoǵyrlanǵan jeri – aýyl. Jastardyń kúshin biriktirmei aýyldy kórkeitý – kúrdeli sharýa. Memlekettiń turaqty damýynyń negizi – básekege qabiletti jastar. Al bul tikelei jas qazaqstandyqtardyń bilim men bilik sapasyna, yntasy men umtylysyna bailanysty. Sondyqtan memlekettik saiasattyń negizgi baǵyttarynyń biri – jastar sektory. Qazaqstanda jastar sektoryna airyqsha nazar aýdarylýy tiis», - deidi jastar qanatynyń tóraǵasy Áigerim Kúkeeva.
Ol aýyl jastarynyń qalaǵa qonys aýdarý úrdisi qarqyn alyp kele jatqanyn aitty.
«Oǵan birneshe faktor áser etýde. Ol – erteńge degen senimniń bolmaýy, jastardyń bos ýaqytynyń tiimsiz ótýi, meditsinalyq qyzmet kórsetý sapasynyń tómendigi, sybailas jemqorlyq. Aýyl turǵyndarynyń úshten bir bóligi ózderiniń eldi mekenderine qonys aýdarýǵa daiyn. Taldaý jumystary kórsetkendei, óńirdegi jastardyń jaǵdaiy máz emes. Jastar óz ómirin aýylmen bailanystyrý úshin turaqty jumys, laiyqty eńbekaqy, ómir súrýge qolaily infraqurylymnyń bolǵanyn qalaidy. Eger belgilengen josparlar durys oryndalsa – memlekettik jastar saiasaty belgili bir nátijege jeteri anyq. Al jastar ómiri sapaly, jańa deńgeige kóteriledi», - deidi ol.
