قازاقستاندا 18 ميلليوننان استام تۇرعىن بولسا, ونىڭ 14,5 ميلليونى 14-29 جاس ارالىعىندا جاس بۋىن. بۇل تۋرالى بٷگٸن ەلوردادا ٶتكەن اۋىل جاستارىنىڭ II رەسپۋبليكالىق فورۋمىندا جاستار قاناتىنىڭ تٶراعاسى ەيگەرٸم كٷكەەۆا ايتتى, دەپ حابارلايدى قازاقپارات.
اۋىل جاستارىنىڭ II رەسپۋبليكالىق فورۋمىندا «اۋىل» حالىقتىق - دەموكراتييالىق پاتريوتتىق پارتيياسىنىڭ باستاماسىمەن «اۋىل» حدپپ جاستار قاناتىنىڭ ەرەجەلەرٸنە ٶزگەرتۋلەر ەنگٸزۋ ماقساتىندا جاڭا قۇرامعا داۋىس بەرٸلدٸ. فورۋمعا قاتىسۋشىلار اتقارۋ كوميتەتٸنٸڭ جاڭا قۇرامىن ماقۇلداپ, جاستار قاناتىنىڭ تٶراعاسىن سايلادى. بۇل قىزمەتكە س.سەيفۋللين اتىنداعى قازاتۋ-دىڭ تەربيە جۇمىسى دەپارتامەنتٸنٸڭ ديرەكتورى ەيگەرٸم كٷكەەۆا بٸراۋىزدان سايلاندى.
«قازاقستاندا 18 ميلليوننان استام تۇرعىن بولسا, ونىڭ 14,5 ميلليونى 14-29 جاس ارالىعىنداعى جاس بۋىن. ەلٸمٸزدٸڭ قاي ٶڭٸرٸندە بولسىن جاستار بار. ولاردىڭ كٶپ شوعىرلانعان جەرٸ – اۋىل. جاستاردىڭ كٷشٸن بٸرٸكتٸرمەي اۋىلدى كٶركەيتۋ – كٷردەلٸ شارۋا. مەملەكەتتٸڭ تۇراقتى دامۋىنىڭ نەگٸزٸ – بەسەكەگە قابٸلەتتٸ جاستار. ال بۇل تٸكەلەي جاس قازاقستاندىقتاردىڭ بٸلٸم مەن بٸلٸك ساپاسىنا, ىنتاسى مەن ۇمتىلىسىنا بايلانىستى. سوندىقتان مەملەكەتتٸك ساياساتتىڭ نەگٸزگٸ باعىتتارىنىڭ بٸرٸ – جاستار سەكتورى. قازاقستاندا جاستار سەكتورىنا ايرىقشا نازار اۋدارىلۋى تيٸس», - دەيدٸ جاستار قاناتىنىڭ تٶراعاسى ەيگەرٸم كٷكەەۆا.
ول اۋىل جاستارىنىڭ قالاعا قونىس اۋدارۋ ٷردٸسٸ قارقىن الىپ كەلە جاتقانىن ايتتى.
«وعان بٸرنەشە فاكتور ەسەر ەتۋدە. ول – ەرتەڭگە دەگەن سەنٸمنٸڭ بولماۋى, جاستاردىڭ بوس ۋاقىتىنىڭ تيٸمسٸز ٶتۋٸ, مەديتسينالىق قىزمەت كٶرسەتۋ ساپاسىنىڭ تٶمەندٸگٸ, سىبايلاس جەمقورلىق. اۋىل تۇرعىندارىنىڭ ٷشتەن بٸر بٶلٸگٸ ٶزدەرٸنٸڭ ەلدٸ مەكەندەرٸنە قونىس اۋدارۋعا دايىن. تالداۋ جۇمىستارى كٶرسەتكەندەي, ٶڭٸردەگٸ جاستاردىڭ جاعدايى مەز ەمەس. جاستار ٶز ٶمٸرٸن اۋىلمەن بايلانىستىرۋ ٷشٸن تۇراقتى جۇمىس, لايىقتى ەڭبەكاقى, ٶمٸر سٷرۋگە قولايلى ينفراقۇرىلىمنىڭ بولعانىن قالايدى. ەگەر بەلگٸلەنگەن جوسپارلار دۇرىس ورىندالسا – مەملەكەتتٸك جاستار ساياساتى بەلگٸلٸ بٸر نەتيجەگە جەتەرٸ انىق. ال جاستار ٶمٸرٸ ساپالى, جاڭا دەڭگەيگە كٶتەرٸلەدٸ», - دەيدٸ ول.
