Foto: Gov.kz
Atyraý oblysynda áielin urǵany úshin sottalǵan Maqat aýdanynyń burynǵy ákimi Rinat Ibragimovqa qatysty birinshi satydaǵy sot úkimi ózgertildi. Bul týraly Atyraý oblystyq soty habarlady.
Sot aqparatynsha, Atyraý qalasynyń №2 soty I.-di materialdyq táýeldilikte bolǵan adamǵa qatysty densaýlyqqa qasaqana aýyrlyǵy ortasha ziian keltirgeni úshin kináli dep tanyp (QK-niń 107-baby 2-bóliginiń 3-tarmaǵy), 2 jyl merzimge bas bostandyǵyn shektedi.
"Jábirlenýshiniń moraldyq shyǵyn óndirý týraly azamattyq talap qoiýy ishinara qanaǵattandyryldy: sottalýshydan 2 mln teńge moraldyq ziian ótemaqysy óndirildi. Is apelliatsiialyq alqaǵa jábirlenýshi jáne qorǵaý tarabynyń shaǵymdary, sondai-aq prokýrordyń ótinishhaty boiynsha tústi. Sot alqasy is materialdaryn zerdelep, I.-diń qylmys jasaýdaǵy kinási jábirlenýshiniń jaýaptarymen, sot-dárigerlik saraptama qortyndysymen dáleldendi degen tujyrymǵa keldi", - delingen habarlamada.
Alqa "kináli adamǵa kórineý belgili materialdyq jaǵynan táýeldi adamǵa qatysty" saralaý belgisi durys taǵylmaǵan dep sheshti.
Jábirlenýshiniń sottalǵanǵa materialdyq táýeldiligi týraly dálel usynylmady. Jábirlenýshiniń kásipkerlik qyzmetti júzege asyrǵany, onyń shotyna aqsha túskeni týraly qujattar usynyldy.
Osyǵan bailanysty, I.-diń áreketi QK-tiń 107-babynyń 1-bóligine qaita saralandy. Oǵan 700 ailyq eseptik kórsetkish mólsherinde aiyppul jazasy taǵaiyndaldy (2 415 000 teńge).
