Búgin Qostanai oblysynyń qylmystyq ister jónindegi mamandandyrylǵan aýdanaralyq sotynyń úkimimen jubaiyn óltirgen Qostanai qalasynyń turǵyny sottaldy, dep habarlaidy "Ult aqparat" oblystyq sottyń baspasóz qyzmetine silteme jasap.
Sot deregine súiensek, oqiǵa 2019 jylǵy 4 tamyzda Qostanai aýdanynyń Zarechnyi aýylynda bolǵan. Sottalýshy otbasylyq janjal kezinde jubaiyn qyryq jerden pyshaqtaǵan. Buǵan jubaiynyń ajyrasqysy kelgeni sebep bolǵan.
«Jubaiynyń moiyn men keýde qýysyna kóptegen (40 shaqty) pyshaq jaraqatyn salady, ol oqiǵa ornynda kóz jumdy. Budan ári sottalýshy qylmystyq jaýapkershilikten jaltarý úshin óziniń moiny men keýdesin jáne bilek aimaǵyn pyshaqpen kesken. Bul áreketin janjal kezinde ózin-ózi qorǵaǵanyn dáleldeý úshin jasaǵany belgili boldy. Sottalýshynyń qasaqana kisi óltirýdegi kinási jábirlenýshiniń, kýágerlerdiń aiǵaqtarymen jáne is boiynsha júrgizilgen saraptamalardyń qorytyndylarymen dáleldendi. Marqumnyń úsh jas balasy qaldy, olardyń qamqorshysy marqumnyń úlken ápkesi bolyp bekitiledi», delingen oblystyq sottyń baspasóz habarlamasynda.
Sot qaskóidiń qylmystyq jaýaptylyǵyn jeńildetetin jáne aýyrlatatyn mán-jailardy anyqtaǵan joq. QR QK 99-baby 1-bóligi boiynsha is qozǵaldy. Jasalǵan qylmystyń aýyrlyǵyn eskere otyryp, sot oǵan 14 jyl 6 ai bas bostandyǵynan aiyrý jazasyn taǵaiyndady.
«Sottalǵan er adam jazasyn qaýipsizdigi barynsha joǵary qylmystyq-atqarý júiesi mekemesinde óteidi. Sot úkimi zańdy kúshine engen joq», - deidi sottyń baspasóz qyzmetindegiler.
Sottalýshynyń qalalyq ákimdiktiń mádeniet jáne tilderdi damytý bóliminde jumys istegeni anyqtaldy.
