Májilis depýtattary bes jyl boiy jalaqysy óspeitinine esh ókinbeidi. Prezidenttiń pármenine kóngen olar 600 myń teńgeden joǵary alatyn ailyǵyn qanaǵat tutyp otyr, dep habarlady Sputnik Qazaqstan agenttigi KTK arnasyna silteme jasap.
Keibir halyq qalaýlylary tipti ómirinde mundai jalaqyny alyp kórmegennen keiin, qazir tek rahatyn kórip júr eken.
"Kóppen kórgen uly toi" degen qazaqtyń jaqsy bir maqaly bar ǵoi. Sondai printsip bolýy kerek. Áielim alady, kartochka sonda. 650, 630 myń teńge qolyna alady. Et – aýyldan, bizdiń týystarymyzdan keledi, sonda bir 170-200 myń teńgedei ketetin shyǵar", - deidi májilis depýtaty Erlan Saiyrov.
Al Elnur Beisenbaev buǵan deiin mundai ailyq almaǵanyn jasyrmady.
"Sol sebepti qazirgi ailyq tiimdi. 600 myń teńge shamasynda qarajat alamyn. Shamamen 150 myń teńgedei azyq-túligimizge ketedi. Óitkeni kópbalaly otbasymyz. Basqasynyń bárine jetedi", - deidi depýtat.
1 aqpannan bastap depýtattar, ministrler men ákimderdiń jalaqysyn aldaǵy bes jylda kóbeitpeitin qaýlyny premer-ministr qabyldady. Alaida sheneýnikter bolsyn, halyq qalaýlylary bolsyn, jalaqyny sol kúii ai saiyn alǵanymen, memlekettik merekelerde syiaqydan qalys qalmaidy.
Búginde óńir basshylarynyń jalaqysy úkimet músheleri men depýtattardyń ailyǵynan ájeptáýir joǵary. Ákimderge biýdjetten tájiribesine qarai eki million teńgege deiin ailyq túsedi. Máselen, Atyraý, Qyzylorda, Túrkistan, Mańǵystaý, Aqtóbe oblystarynyń basshylary sol qatarda. Al memlekettik qyzmette az tájiribesi bar Qaraǵandy, Pavlodar oblystary ákimderiniń bir ailyq jalaqysy million teńgedei.
Ministrlerdiń jalaqysy 900 myńnan bastalsa, qos palata depýtattary 600 myń teńgeden joǵary tabys tabady.
