Búgin májilis otyrysynda depýtat Amanjol Áltai áielderdiń quqyǵyn qorǵap jatqanymyzben, qoǵamda áielinen jábir kóretin erkek, balasynan qorlyq kórgen ata-analar da bar ekenin aitty. Bul týraly "Ult aqparat" Stan.kz aqparat agenttigine silteme jasap habarlaidy.
Amanjol Áltaidyń aitýynsha, qoǵamda túrli keleńsiz oqiǵalar bolyp jatyr.
"Qazaq degen halyq anasyn ardaqtaǵan, arýyn aialaǵan, ata-anaǵa qurmetpen qaraǵan halyqtyń ókilimiz. Otbasy - óte kúrdeli institýt. Ókinishke qarai, búgingi qoǵamda túrli keleńsiz oqiǵalar beleń alyp jatyr. Er azamattan qysym kórgen áiel adam ǵana emes, áielden de qysym kórgen erkekter de barshylyq. Sonymen birge óziniń qartaiǵan shaǵynda balalarynan qysym kórip otyrǵan qart ata-analar da jeterlik. Biz "ákemmen aqyldasaiyn", "ákemnen suraiyn", "ákem biledi" degen túsinikpen ósken býyn edik, qazir "mamam biledi", "mamamnan suraimyn", "mamam sheshedi" degen balalar kóbeiip bara jatyr. Oǵan keshe ǵana Qaraǵandyda 78 jastaǵy keiýananyń óz balasynan zorlyq-zomylyq kórgeni dálel bolyp otyr", – deidi májilismen.
Ol bileginen ál ketip, boiyndaǵy kúshi sarqylǵan ata-anasyna jábir kórsetetin balalar kóbeigenine alańdap otyr.
"Qoǵamda er azamattar men ata-analardyń quqyǵyn qorǵaý máselesine qandai jaýap beriledi? Aqparat salasynyń ókiline aitarym, búginde aqparat keńistiginde qazaq jigitterin, er-azamattaryn ez, qorqaq, jaltaq qylyp kórsetetin túrli kontenttiń kóbeiýi, komediialyq janrdaǵy filmderdiń kóbeiýi neni túsindiredi?" - dep Amanjol Áltai baiandamashy Juldyz Súleimenova men Mádeniet jáne aqparat ministrliginiń ókiline suraq qoidy.
Depýtat Juldyz Súleimenova zań jobasy tek áielder men balalardyń quqyǵyn ǵana qorǵamaitynyn aitty.
"Densaýlyǵyna qasaqana jeńil ziian keltirý jáne uryp-soǵý baby barlyq azamattyń quqyǵyn qamtidy. Sondyqtan zań áiel men er azamatty bólmeidi, áieldiń quqyǵy – adamnyń quqyǵy, er azamattyń da quqyǵy – adamnyń quqyǵy degen qaǵidatty negizge alyp jasalyp otyr", – dedi baiandamashy.
Ol konstitýtsiiada balalardyń zeinettegi ata-anasyna qamqorlyq kórsetýi naqty belgilengenin atap ótti.
"Siz aitqan oqiǵa qoǵamda úlken másele bar ekenin kórsetip otyr. Tárbieni kúsheitip, aqparattandyrýdy, psihologiialyq qoldaýdy kúsheitýimiz qajet. Dástúrli otbasylyq qundylyqtar boiynsha da naqty normalar bar", - dep atap ótti ol.
Al Mádeniet jáne aqparat vitse-ministri Evgenii Kochetov zańnamany basshylyqqa alyp jumys isteitinin aitty.
"Qazir áke institýtyn damytýdyń mańyzdy ekenin túsinip otyrmyz. Byltyr "Ákeler kúnin" engizdik. "Ákeler odaǵy" institýtynyń jumysyna jan-jaqty qoldaý kórsetip kelemiz. Teńsizdik máselesi men otbasyndaǵy er adamnyń rólin anyqtaý boiynsha jumystar atqarylady", - dedi Kochetov.
