Foto: Instagram.com
"Áielderin hidjab kimegeni úshin óltirip jatyr" degen ánshi Ulanǵasyr Qamige bas bostandyǵynan aiyrylý qaýpi tóndi.
31-arnanyń Informbiýro jańalyqtar baǵdarlamasynyń habarlaýynsha, basy daýǵa qalǵan ánshiniń sózderine quqyqtyq baǵa berilmek. Qoǵam belsendisi Saida Sisembaeva ishki ister ministrligine ánshiniń ústinen aryz túsirgen. Belsendi Qami qylmystyq kodekstiń 174 babyn buzdy dep sanaidy. Iaǵni áleýmettik, genderlik, dini alaýyzdyqty qozdyrǵan. Ári muny áielderge jasalǵan zorlyq-zombylyqty aqtaý áreketi dep atady.
Zańger Nurbolat Ibraev tártip bárine ortaq bolǵandyqtan, tanymal tulǵalardyń da jaýapqa tartylǵanyn kórsetken durys deidi. Sózinshe, bul kópshilikke sabaq bolady.
"Ótkende ártisterimiz – Qairat Nurtas bolsyn, basqanyń bolsyn jazaǵa tartylǵanyn kórsetip jatqany óte durys. Sebebi adamdar "budan qutylyp ketýge bolady ǵoi, basqa tásilderi bar" degen oidan aýlaq bolyp, qandai da bir ákimshilik, qandai da bir zańǵa qaishy áreket jasaǵanda, oǵan tiisti jaza bar ekenin biledi", – dedi zańger Nurbolat Ibraev.
Akter Ýálibek Ábdiraiymov ónerdegi inileriniń tártip buzyp, jaza arqalaýy el talqylaityn, dúrligetin dúnie emes dep sanaidy. Sózinshe, memlekette odan da mańyzdy máseleler bar.
"15 jylǵa qamalyp shyqqan adam siiaqty. Endi bir sumdyq. Adamnyń kúlkisi keledi. 15 kúnge qamalyp shyǵyp kele jatsa, aldynan áke-shesheleri kútip jatyr. Bir soǵystan zardap shegip, osy Qazaqstan úshin janyn pida qylǵandai. Nemese ushaqta tóbelesip, sol ushaqtaǵy terroristterdi ustap sodan qamalǵan balany shyǵarǵandai. Quqyq qorǵaý organy ortaq ekenin bir bildirip qoidy. Zań ortaq. Tártip buzbaý kerek", – dedi óner iesi Ýálibek Ábdiraiymov.
Eske salaiyq, hitmen Ulanǵasyr Qami bolashaq jaryna namaz oqytyp, hidjab kigizetinin aitqan oiy qoǵamda qyzý talqyǵa túsken edi. Qoǵam belsendisi ánshiniń ústinen aryz túsirgeni aityldy.
