TMD Parlamentaralyq assambleiasynyń halyqaralyq baiqaýshylary partiialyq tizimdegi áielder men jastarǵa arnalǵan 30 paiyzdyq kvotanyń qandai nátije beretinin aityp berdi, dep habarlaidy QazAqparat.
TMD Parlamentaralyq assambleiasynyń baiqaýshysy Oleg Tsepkinniń aitýynsha, Qazaqstan jastary sailaýǵa belsendi qatysyp jatyr.
«Ýchaskelerde jastardy kórdik. Ásirese 18 jasqa tolǵan azamattardyń daýys berýi aitarlyqtai baiqalady. Búgin olardyń alǵashqy sailaýy jáne olardy yntalandyrý úshin ulttyq shyǵarmalar jinaqtalǵan kitaptar syilandy. Bul istiń sapaly sailaýǵa qanshalyqty áser etetinin, árine, nátijeler boiynsha qaraý kerek», - deidi Oleg Tsepkin Sputnik-Qazaqstan mýltimedialyq baspasóz ortalyǵynda ótken onlain brifingte.
Onyń aitýynsha, qazirgi ýaqytta sailaýǵa qatysatyn jáne Parlament Májilisine kirmeitin partiialarda da jastar pozitsiiasyna baǵyttalǵan baǵdarlamalary bar.
«Óitkeni partiialardyń baǵdarlamalarynda IT taqyryby, áleýmettik máselelerge qarjyny tiimdi paidalaný jóninde baǵdarlamalar bar. Jas ereksheligin kvotalaýǵa bailanysty zańnamadaǵy ózgerister belgili bir áserin tigizýi múmkin. Sebebi Qazaqstan turǵyndary tek Parlamentti ǵana emes, barlyq deńgeidegi depýtattardy da sailaidy. Mundai múmkindikter jastardyń múddesi úshin de paida bolýda», - deidi halyqaralyq baiqaýshy.
TMD Parlamentaralyq assambleiasynyń baiqaýshysy, Ózbekstan Respýblikasy Olii Majlisiniń zań shyǵarý palatasy Sybailas jemqorlyqqa qarsy is-qimyl jáne sot-quqyqtyq máseleler komitetiniń múshesi Adham Shadmanov óz elindegi áielder men jastar úshin engizilgen kvotany mysal retinde keltirdi.
«Keibir ekonomister bolashaq Parlament jas ári áielderge toly bolady dep boljam jasaýda. Kvota boiynsha qabyldanǵan irgeli ózgerister óz nátijesin beredi. 2019 jyly bizde de Parlament sailaýy boldy jáne oǵan ózim de qatystym. Bizde 8 jyl buryn belgilengen kvota nátijesin bergenin de aitqym keledi. Qazirgi ýaqytta bizdiń Parlamentte áielderdiń úlesi – 33%. Sonymen birge, men mundai jas Parlamentti eshqashan kórgen emespin – jasy elýden asqan depýtattardyń úlesi 20% ǵana», - deidi Adham Shadmanov.
