QR Prezidentiniń janyndaǵy Áielder isteri jáne otbasylyq-demografiialyq saiasat jónindegi Ulttyq komissiianyń otyrysy ótti
Otyrys barysynda Komissiianyń jańartylǵan jumys jospary men reglamenti bekitildi, dep habarlaidy El.kz saity.
Komissiia tóraǵasy, Prezident Ákimshiligi Basshysynyń orynbasary Aida Balaeva otyrysty ashyq dep jariialap, Komissiia jumysynyń negizgi basymdyǵy – adamgershilik-otbasylyq qundylyqtardy nyǵaitý, balalardyń quqyqtary men zańdy múddelerin qorǵaý, áielderdiń quqyqtary men múmkindikterin keńeitý jónindegi mindetter ekenin aitty.
«Qujat memlekettik otbasy, demografiialyq jáne genderlik saiasat salasyndaǵy ózekti mindetterdi aishyqtaýǵa baǵyttalǵan bastamalar toptamasyn qarastyrady. Olardyń qatarynda, ana men bala ólimin azaitý, jasóspirimder arasyndaǵy álimjettilik pen sýitsidtiń aldyn alý, jynystyq zorlyq kórsetý qylmystarynan qorǵaý, Genderlik bilim ortalyǵyn qurý jáne t.b. taqyryptar bar», - dedi Balaeva.
Sonymen qatar, problemalyq máselelerdi sheshý úshin Ulttyq komissiia alańynda memlekettik organdardy jedel tyńdaý kestesi qalyptastyryldy.
Josparda Komissiianyń saraptamalyq-taldaý jumysyn júrgizý quraldary men tetikteriniń keń spektri kózdelgen. Atap aitqanda, túrli beiimdeý jáne áleýmettik qoldaý ortalyqtaryn ádistemelik súiemeldeý qamtamasyz etiledi, qiyn ómirlik jaǵdaiǵa tap bolǵan balalar men analarǵa qajetti kómek kórsetý múmkindigin qamtamasyz etetin otbasylardyń áleýmettik kartasy jasalady.
Kún tártibi aiasynda balalar men jasóspirimderge rýhani-adamgershilik tárbie berý máselesi de qaraldy. Kámeletke tolmaǵandar arasyndaǵy turmystyq zorlyq-zombylyq pen qylmystyń aldyn alýǵa, balalarǵa qatysty quqyq qorǵaý quraldaryn damytýǵa baǵyttalǵan profilaktikalyq sharalar kesheni usynyldy. Sonymen qatar, ata-analar úshin óz balalaryn tárbieleýmen kóbirek ainalysýǵa múmkindikter jasaýǵa yqpal etetin quqyqtyq ortany damytý boiynsha naqty sharalar usynyldy.
Aqparat jáne qoǵamdyq damý vitse-ministri A.S. Danilov ortalyq jáne jergilikti deńgeilerdegi memlekettik basqarý júiesinde áiel basshylardyń áleýetin arttyrý boiynsha jobany iske asyrýdy usyndy.
«Jobany QR Prezidentiniń janyndaǵy Áielder isteri jáne otbasylyq-demografiialyq saiasat jónindegi Ulttyq komissiia egidasy aiasynda BUU-nyń áielder qurylymymen birlesip iske asyrý josparlanyp otyr. Jobaǵa túrli sarapshylar toby men basqa da halyqaralyq uiymdardy tartý kózdelýde. Joba aiasynda eldiń barlyq aimaǵyndaǵy áielder men qyzdarǵa arnalǵan oqytý is-sharalary ótkiziledi (seminarlar, treningter, sheberlik sabaqtary koých sessiialar). Joba biylǵy jyldyń shilde aiynda bastalady. Atalǵan joba eldiń saiasi jáne qoǵamdyq ómirindegi áielderdiń rólin kúsheitýge septigin tigizedi», dep atap ótti.
Sonymen qatar, Ulttyq komissiia músheleri – Riza Moldasheva men (Abai oblysynan, «Semei tańy» gazetiniń bas redaktory) Lázát Qojahmetovanyń («Talbesik» kóp balaly analar odaǵy» QB basshysy) baiandamasy tyńdaldy.
Olar otbasy, mektep jáne qoǵam arasyndaǵy bailanysty nyǵaitý tetikterin keńeitý jóninde usynystar aityp, otbasylyq qundylyqtardy nyǵaitý, bala tárbiesindegi áke institýty máselelerine, problemalyq máselelerdi sheshý monitoringine jáne osy baǵyttaǵy komissiia qyzmetiniń perspektivalaryna nazar aýdardy.
«Búgin biz azamattyq qoǵamnyń barlyq institýttaryn tarta otyryp, Prezidenttiń genderlik saiasat salasy men barlyǵyna teń múmkindik berýge arnalǵan reformasyn ary qarai iske asyrýǵa qajetti keshendi qadamdar qamtylǵan Jospardy bekittik. Komissiia Josparda kórsetilgen barlyq baǵyt boiynsha qoǵammen barynsha ashyq jáne jan-jaqty bailanys ornatyp, aldaǵy ortaq jumysymyzda aldyn-alý sharalaryna úlken mán berý kerek» dedi Aida Balaeva.
Otyrys sońynda Ulttyq komissiia tóraǵasy memlekettik organdarǵa birqatar tapsyrmalar berdi.
